Sekretáriu Estadu Kooperativa, Elizário Ferreira, fó pose ba estrutura Kooperativa Multisetorál COMUHABO, iha sede suku Home, sesta (17/09). Imajen TATOLI/Antónia Gusmão

LAUTÉN, 17 setembru 2021 (TATOLI)-Sekretáriu Estadu Kooperativa (SEKoop), Elizário Ferreira, fó pose ba estrutura Kooperativa Multisetorál Hamutuk Ba Oin (COMUHABO), hodi ofisiálmente deklara-an hala’o atividade kooperativa iha aldeia Cenuloru, suku Home, postu administrativu Lospalos, munisipiu Lautém.

“Iha vida kooperativa ezije karater umilde, onestu no simplisidade. Ne’e katak, hahú ho umildade, dezenvolve onestidade, no kontrola ho simplisidade mak bele asegura ita-nia kooperativa ba oin. Bainhira ita dezenvolve kooperativa ho loko-an no foti-an, komunikasaun la di’ak, ita-nia kooperativa sei mate no sei la la’o ba oin,” Sekretáriu Estadu Elizário Ferreira, hateten, liuhosi intervensaun iha serimónia fó pose ba estrutura kooperativa, iha sede suku Home, sesta ne’e.

Kooperativa ne’e harii iha loron 15 setembru 2021 ho membru hamutuk na’in-28, ho kapitál inisiál hamutuk $690.

Nune’e, governante ne’e husu ba membru no dirijente kooperativa sira atu organiza beibeik reuniaun kada semana, nune’e labele iha deskonfiansa ba malu.

“Entaun, reuniaun ne’e tenke la’o beibeik atu nune’e bele asegura komunikasaun di’ak, hodi labele hamosu ba deskonfiansa iha kooperativa nia laran no ikus mai bele fahe malu,” nia fó hanoin.

Iha biban hanesan, Prezidente Kooperativa COMUHABO, Eurico Pereira, apresia no orgullu ho prezensa Sekretáriu Estadu Kooperativa no ekipa tanba bele hakat to’o ona iha sira-nia suku, maski grupu kooperativa kiik ne’e foin estabelese.

“Kooperativa ne’e foin mosu ba ita, úniku maka ita foin harii. Ita harii kooperativa ne’e tanba hakarak hadi’a ita-nia vida. Tanba ita hakarak atu kuda ita nia moris liuhosi kooperativa ne’e. Tanba ne’e, ita ne’ebé durante esforsu no sai parte kooperativa, tenke serbisu hamutuk hodi lori kooperativa ba oin,” nia enkoraja.

Responsável Kooperativa hatutan “Kooperativa ne’e hanaran ‘Ba Oin’, la signifika atu la’o mesak, maibé hotu-hotu tenke la’o hamutuk hodi atinje objetivu ne’ebé planeia ona.”

Nia husu ba SEKoop atu apoia finanseira ba sira hodi bele harii sede, nune’e bele halibur membru hala’o atividade kooperativa.

“Tanba ne’e, hanesan kooperativa, husu atu ajuda netik ami tanba hanesan estrutura foun ne’ebé foin mak harii kooperativa,” nia dehan.

Kooperativa COMUHABO nu’udár kooperativa integradu ne’ebé hala’o atividade kréditu no tuir planu sei promove mós atividade ortikultura inklui produsaun seluk.

Jornalista : Antónia Gusmão

Editora      : Julia Chatarina

HAKEREK NO HATÁN

Please enter your comment!
Please enter your name here