Sekretáriu Estadu Kooperativa (SEKoop), Elizário Ferreira, entrega sertifikadu no hasai foto hamutuk ho entidade ne’ebé partisipa iha implementasaun programa Cesta Bázika iha Lautém, iha salauan Administrasaun Lautém, sesta (17/09). Imajen TATOLI/Antónia Gusmão

LAUTÉM, 17 setembru 2021 (TATOLI)–Sekretáriu Estadu Kooperativa (SEKoop), Elizário Ferreira, iha sesta ne’e, halo seremónia enserramentu ba implementasaun Cesta Bázika iha munisípiu Lautém.

Sekretáriu Estadu rekoñese durante implementasaun programa nasionál ne’e mosu problema oitoan tanba iha diferensa ideia, maibé tanba iha kontribuisaun hosi entidade hotu bele lori susesu ba implementasaun.

“Serbisu ba oin sei iha, tanba ne’e nafatin husu ba komunidade atu kontinua kuda produtu tanba Governu sei estabelese loja rua hanesan ‘Loja do Povu’, ne’ebé sei harii hosi Ministériu Turizmu, Komérsiu no Indústria (MTKI) no ‘Loja Kooperativa’ ne’ebé sei harii hosi SEKoop rasik,” governante ne’e dehan durante seremónia enserramentu programa, ne’ebé hala’o iha salaun Administrasaun Lautém, sesta ne’e.

Notísia relevante: SEKoop komprometidu harii loja kooperativa iha Ainaro

Iha ámbitu ne’e, SEKoop fahe sertifikadu nu’udar aktu agradesimentu no rekoñesimentu Governu ba entidade hotu ne’ebé mak apoiu ba implementasaun programa nasionál, ligadu ho rekuperasaun ekonómika iha ámbitu prevensaun no mitigasaun surtu COVID-19 iha Timor-Leste.

Ba kestaun ne’e, SEKoop komunika ona ho autoridade lokál sira atu orienta povu kuda barak liután produtu agríkola.

“MTKI no SEKoop serbisu hamutuk de’it, se MTKI responsabiliza ba loja entaun SEKoop sei responsabiliza ba armazen, edukasaun no formasaun. Atu nune’e jestaun kona-ba loja ne’e bele la’o ho di’ak no iha sustentabilidade,” nia akresenta.

Tuir governante ne’e, iha programa lubuk ida mak sei implementa, tanba Governu liuhosi Konsellu Ministru diskute ona subsídiu ba funsionáriu, ne’ebé sei la simu osan, maibé simu de’it produtu ho folin $50, katak sei simu foos no produtu agríkola ne’ebé sei mai hosi agrikultór.

Iha fatin hanesan, Administradór munisípiu Lautém, Domingos Savio, apresia ho inisativa Sekretáriu Estadu no kompromete sei mobiliza populasaun prodús barak liután, atu nune’e bainhira iha programa nasionál sira hanesan fahe ai-han, Lautém-oan sira labele susar tanba laiha produtu.

“Husu ba Xefe suku sira orienta extensionista sira atu hakbesik ba komunidade agrikultór hodi hakbiit koñesimentu hodi prodús produtu lokál barak, tanba foin lalais MTKI mai ona iha Lautém hodi husu fatin, ne’ebé ha’u rasik autoriza ona fatin atu sira harii ‘Loja do Povu’, ne’e katak ita-nia agrikultór sira-nia serbisu maka prodús ai-han lokál hodi submete ba loja, ita hotu serbisu hamutuk ba ita-nia nasaun, liuliu Lautém labele monu ba krize ai-han,” Autoridade munisipál ne’e enkoraja.

Seremónia enserramentu ne’e partisipa hosi Komandante Polísia Nasionál Timor-Leste (PNTL) munisípiu Lautém inklui membru sira, Administradór postu, autoridade lokál no empreza sira ne’ebé partisipa fahe sasán Cesta Bázika.

SEKoop hanesan responsável ba implementasaun Cesta Bázika iha munisípiu Covalima, Liquiçá, Lautém, Ainaro, Aileu, Manufahi  no Manatuto, kompostu hosi postu administrativu 33, suku 181, aldeia 912, ho totál populasaun hamutuk 432.529.

Kompañia hirak ne’ebé partisipa distribuisaun Cesta Bázika no hetan kontratu hosi SEKoop mak hanesan Green Mota Ain, Paralel, Star World, Jumar, Haicsulor, Incanto, Aitula, Betulei, no seluk tan.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here