Partidu CNRT liuhosi Vise-Prezidente, Virgílio Smith, sei fó sai CNRT nia kandidatura Prezidente Repúblika atu kompete iha Eleisaun Prezidensiál perídou 2022-2027, liuhosi konferénsia imprensa ne’ebé hala’o iha Bairro dos Grilhos, Dili. Imajen TATOLI/Evaristo Soares Martins.

DILI, 17 setembru 2021 (TATOLI)–Partidu Congresso Nacional de Reconstrução de Timorense (CNRT) lideradu Kay Rala Xanana Gusmão, sei fó-sai ninia kandidatura Prezidente Repúblika (PR) hodi kompete iha eleisaun prezidensiál iha tempu ne’ebé oportunu.

“Ho iha ninia Estatutu, Partidu CNRT sei deside iha tempu ne’ebé oportunu, kona-bá kandidatu Partidu-nian, ne’ebé sei konkorre ba Eleisaun Prezidensiál ba períodu 2022-2027,” Vise-Prezidente Partidu CNRT, Virgílio Smith informa liuhosi konferénsia imprensa, iha Bairro dos Grilhos, Dili, sesta ne’e.

Vise-Prezidente Partidu CNRT ne’e fó-sai katak, haree ba situasaun polítika atuál, nune’e membru hosi Konferénsia Nasional Partidu CNRT sei reune, iha oportunidade ne’ebé loos, ho hanoin atu deside kona-bá kandidatu ne’ebé Partidu sei apoia iha Eleisaun Prezidensiál ne’ebé sei mai.

“Kona-ba informasaun ne’ebé la’o hela iha públiku nia leet, katak Maun Boot Kay Rala Xanana Gusmão katak Partidu CNRT rasik, apoia daudauk ona ka sei apoia kandidatu balun, Komisaun Polítika Nasionál hosi Partidu CNRT mai deklara iha ne’e katak buat ne’e hotu laloos no mesak lia falsu,” Vise-Prezidente CNRT ne’e hateten.

Nu’udar Partidu polítiku ida, CNRT defende katak tenke tuir didi’ak regra ne’ebé prevee ona iha ninia estatutu, tan ne’e hakarak informa ba públiku no ba militante Partidu-nian, ein-partikulár, katak partidu liuhosi ninia órgaun másimu ne’ebé hatuur ona iha ninia Estatutu sei hasai desizaun ruma iha tempu ne’ebé oportunu.

“Kona-bá kandidatu ida-ne’ebé mak Partidu sei fó ninia apoiu polítiku tomak ho misaun atu salvaguarda Estadu Direitu Demokrátiku, tuir saida mak hakerek ona iha Konstituisaun RDTL-nian,” nia dehan.

Komisaun Polítika Nasional hakarak fó hatene ba públiku katak Partidu CNRT seidauk no sei la orienta kualkér partidu ida atu lori fali Prezidente Partidu CNRT nia naran hodi fó apoia ba partidu sira seluk.

Jornalista : Evaristo Soares Martins

Editór       : Cancio Ximenes

1 KOMENTÁRIU

  1. se fo apoio ba lider independen ruma, mak Avo Ramos se interna partidu nian, se la sala Dr. Agiu Pereira.
    tanba atu sai PR tenke ema nebe mak diplomasia makas la bele ema ne’ebe hasai Dr. iha rai laran, nia la hatene buat ida, hare ema ne’ebe iha kuinhesmentu ba mundu internasional. laos kuinhese dt rai laran, mos hakarak kandidatu na ba PR.

HAKEREK NO HATÁN

Please enter your comment!
Please enter your name here