Konselleiru Másimu Partidu KHUNTO, José dos Santos 'Naimori' Bucar, bainhira rona desizaun Tribunál, relasiona ho akuzasaun Ministériu Públika, kinta (16/09). Imajen TATOLI/Natalino Belo

BAUCAU, 16 setembru 2021 (TATOLI)—Tribunál Distritál Baucau (TDB) iha kinta ne’e, halo leitura akordaun no foti desizaun finál hodi absolve kazu Konselleiru Másimu Partidu Kmanek Haburas Unidade Nasionál Timor-oan (KHUNTO), José dos Santos ‘Naimori’ Bucar.

Konselleiru Másimu KHUNTO hetan akuzasaun hosi Ministériu Públiku (MP), envolve iha kazu obstrusaun ba autoridade públika.

Hafoin halo deliberasaun, Tribunál haree iha faktu provadu sira hanesan Arguidu nu’udar Konselleiru Másimu Partidu KHUNTO, iha loron 02 maiu 2018 tuir dalan atu halo kampaña iha loron 03 maiu, iha munisípiu Lautém, maibé momentu ne’ebá, Polísia Nasionál Timor-Leste (PNTL) halo autostop, maibé hosi parte Konselleiru Másimu Naimori hakarak koopera ho autoridade seguransa.

Aleinde ne’e, Arguidu nu’udar membru Konsellu Estadu maibé antes ne’e, TDB hato’o karta levantamentu imunidade ba Arguidu nune’e bele hatan ba prosesu iha Tribunál.

Arguidu iha rejistu kriminál iha tinan 2004, ho pena prizaun tinan 6.

Faktu ne’ebé la provadu mak hanesan Arguidu laiha orientasaun ba militante atu ameasa hasoru entidade seguransa no Arguidu la halo ameasa hasoru autoridade seguransa no la halo aktu kontra lei.

Nune’e, Tribunál to’o iha konkluzaun no desizaun absolve Arguidu José dos Santos ‘Naimori’ Bucar ba akuzasaun krime obstrusaun ba autoridade publika ne’ebé previstu iha artigu 243 Kódigu Penál ho ameasa pena prozaun tinan 2 to’o 8 no la kondena atu selu ba koima.

Tribunál mós sei notifika desizaun ne’e ba Prezidente Repúblika, Francisco Guterres ‘Lú Olo’, ne’ebé nu’udar Prezidente Konsellu Estadu, nune’e iha koñesementu atu kontinua ezerse funsaun nu’udar membru Konsellu Estadu.

TDB rasik fó durasaun loron 15 ba parte defeza no MP atu halo rekursu bainhira la sastifaz ho desizaun.

Kazu refere akontese bainhira Konselleiru Másimu Naimori hamutuk ho militantee partidu Aliansa Maioria Parlamentar (AMP), tuir dalan konvoi ho karreta ho destinasaun hosi área Foiluro atu ba fatin deskansa tanba tuir ajenda loron 03 marsu 2018 atu partisipa iha kampaña pre-eleitorál iha Lautém.

Advogadu Privadu hosi Arguidu, Ismael Assunção Lopes, konsidera desizaun Tribunál  favorável tebes tanba bazeia ba faktu ne’ebé rekolla liuhosi julgamentu dahuluk.

Notísia relevante: TDB hahú julgamentu ba kazu Konselleiru Másimu KHUNTO

Advogadu Privadu hosi Arguidu, Ismael Assunção Lopes. Imajen TATOLI/Natalino Belo

“Desizaun Tribunál bazeia ba faktu ne’ebé Ministériu Públiku lori no prova rua ne’ebé mak rekolla durante iha audénsia julgamentu hanesan ameasa grave ka lae, tanba hosi ha’u-nia kliente laiha ameasa grave ka destrusaun grave ruma hasoru autoridade Polisiál,” nia dehan.

Julgamentu no leitura akordaun prezide hosi Juíz koletiva, José Escurial, Maria Modesta, inklui Sribuana da Costa, Ministériu Públiku reprezenta hosi Bartolomeu de Araújo, enkuantu advogadu privadu hosi Arguidu mak hanesan Ismael Assunção Lopes no Arnaldo da Costa Lopes.

Jornalista : Natalino Belo

Editora      : Julia Chatarina

HAKEREK NO HATÁN

Please enter your comment!
Please enter your name here