Sekretáriu Estadu Kooperativa (SEKoop), Elizário Ferreira, hato'o hela diskursu iha seremónia enserramentu programa Cesta Bázika, iha munisípiu Manatuto, kinta (16/09/2021). Imajen TATOLI/Antónia Gusmão

MANATUTO, 16 setembru 2021 (TATOLI)–Governu liuhosi Sekretaria Estadu Kooperativa (SEKoop), iha kinta ne’e, realiza seremónia enserramentu programa Cesta Bázika iha Manatuto no agradese ba entidade hotu nia apoia durante implementasaun programa nasionál ne’e.

“Lori Governu-nia naran, atu agradese ba esforsu hosi administradór munisípiu, postu, komandante polísia munisípiu, postu, inklui Ofisiál Polísia Suku (OPS), ba hotu-hotu ninia kontribuisaun mak distribuisaun Cesta Bázika bele hetan susesu no hetan rezultadu di’ak,” Sekretáriu Estadu Kooperativa, Elizário Ferreira, hateten, iha salaun reuniaun Administrasaun Manatuto.

Iha ámbitu ne’e, SEKoop atribui sertifikadu ba Administradór postu sira, líder komunitáriu, Polísia Nasionál Timor-Leste (PNTL) munisipál, eskuadra no OPS.

Governante ne’e, rekoñese durante implementasaun programa nasionál ne’e, empreza sira hasoru difikuldade barak no iha situasaun difísil, maibé konsege halo kooperasaun ho autoridade lokál, seguransa, liu-liu sira ne’ebé mak esforsu maka’as hodi ezekuta serbisu distribuisaun sasán ein pakotementu.

Notísia relevante: MF konklui pagamentu Cesta Bázika ba kompañia fornesedór 188

Iha fatin hanesan, reprezentante kompañia fornesedór, Diretora Kompañia Santos Unip. Lda, Maria da Gloria dos Santos, konsidera programa Governu ne’e nu’udár parte ida hosi rekuperasaun ekonómika hodi responde ba situasaun falta ai-han, tanba kauza hosi pandemia globál, ne’ebé programa ne’e fó benefísiu ba entidade hotu.

“Hakarak agradese ba VIII Governu ne’ebé fó duni oportunidade ba empregadór nasionál sira, hanesan ami hodi envolve iha programa ne’e,” nia dehan.

Komandante PNTL munisípiu Manatuto, Superintendente João da Costa, haktuir, durante fahe produtu Cesta Bázika iha Manatuto, nota katak la’o ho di’ak no laiha problema.

“Diferente ho munisípiu seluk ne’ebé ema sempre krítika kona-ba folin no kuantidade sasán. Tanba ne’e, ha’u hakarak hato’o agradesimentu ba entidade hotu nia kontribuisaun, ne’ebé iha inísiu to’o ohin loron buat hotu la’o ho di’ak, tanba ita hotu nia serbisu hamutuk to’o programa ne’e nia rohan,” nia hatutan.

SEKoop hanesan responsável ba implementasaun Cesta Bázika iha munisípiu Covalima, Liquiçá, Lautém, Ainaro, Aileu, Manufahi  no Manatuto, kompostu hosi postu administrativu 33, suku 181, aldeia 912, ho totál populasaun hamutuk 432.529.

Kompañia hirak ne’ebé partisipa distribuisaun Cesta Bázika no hetan kontratu hosi SEKoop mak hanesan Green Mota Ain, Paralel, Star World, Jumar, Haicsulor, Incanto, Aitula, Betulei, no seluk tan.

Munisípiu Manatuto, kompostu hosi postu administrativu neen hanesan Laleia, Laclo, Manatuto villa, Laklubar, Soibada no Natarbora, iha suku hamutuk 31, no aldeia 106.

Enkuantu, bazeia ba levantamentu dadus populasaun tinan 2018, rejista ema hamutuk 54.032, kompostu hosi feto 26.372, mane iha 27.660.

Jornalista : Antónia Gusmão

Editora      : Julia Chatarina

HAKEREK NO HATÁN

Please enter your comment!
Please enter your name here