Sekretáriu Estadu Kooperativa (SEKoop), Elizário Ferreira, dada-lia ho Prezidente Kooperativa CU Domi-huhun, Paulos Pelile Lazadjar, iha suku Ma’abat, Manatuto, kinta (16/09). Imajen/SEKoop

MANATUTO, 16 setembru 2021 (TATOLI)–Sekretáriu Estadu Kooperativa (SEKoop), Elizário Ferreira, halo vizita ba Kooperativa Kréditu Uniaun (CU, sigla portugés) Domi-huhun, iha suku Ma’abat, postu administrativu Manatuto, munisípiu Manatuto, no husu atu kria atividade produsaun.

“Sé bele imi expande tan imi-nia atividade kooperativa ne’e hanesan iha área produsaun nian,” Sekretáriu Estadu Elizário, hateten ba responsável kooperativa, iha suku Ma’abat, kinta ne’e.

Biban ne’e, governante ne’e husu ba responsável atu submete proposta ba SEKoop hodi husu apoia harii sede kooperativa inklui fasilidade, tanba Sekretáriu Estadu nota katak Kooperativa CU Domi-huhun hambrik kle’ur ona no fó benefísiu barak ona ba membru sira, tanba ne’e merese hetan ajuda hosi Governu.

Kooperativa ne’e estabelese iha tinan 2007 no dadaun ne’e akumula ona membru kooperativa hamutuk 238 no halibur ona osan hamutuk $115.000.

Notísia relevante: Kooperativa CU Domi-huhun halibur ona osan $115.000

Enkuantu,  kooperativa ne’e seidauk iha fatin própriu, maibé iha ona rai atu harii edifísiu.

Aleinde ne’e, SEKoop kontinua enkoraja membru-sira atu nafatin ativu iha kooperativa no promote sei destaka funsionáriu SEKoop na’in-rua atu sai  hanesan motivadór hodi akompaña atividade kooperativa.

Iha fatin hanesan, Prezidente Kooperativa CU Domi-huhun, Paulos Pelile Lazadjar, kompromete sei expande tan atividade tuir pedidu SEKoop, tanba membru kooperativa maioria hala’o vida iha área agrikultura.

“Ami bele haluan tan ami-nia atividade iha produsaun, tanba membru sira ne’e halo produsaun hare barak inklui peska,” Paulos Pelile otimista.

Maibé, responsável ne’e dehan, atu kria tan atividade, membru sira tenke hetan uluk formasaun.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here