Diretór SEFOPE RAEOA, Vicente Vas. Imajen TATOLI/Abílio Elo Nini.

OÉ-CUSSE, 16 setembro 2021 (TATOLI)—Sekretáriu Estadu Formasaun Profisionál no Empregu (SEFOPE) Rejiaun Administrativa Espesiál Oé-Cusse Ambeno (RAEOA) suspende nafatin atividade formasaun iha Sentru Formasaun Bansone tanba númeru kazu pozitivu COVID-19 iha Oé-Cusse kada loron aumenta.

Notísia Relevante: SEFOPE fasilita joven 65 tuir formasaun iha Sentru Formasaun Bansone

“Durante ne’e ami suspende formasaun kuaze fulan-haat ona tanba desizaun autoridade katak suspende atividade ensinu aprendizajen inklui formasaun no kapasitasaun iha Sentru Formasaun sira, entaun ita hein fali bainhira situasaun la’o di’ak foin mak re-ativa fali,” Diretór SEFOPE RAEOA, Vicente Vas, informa ba Agência Tatoli iha Sikluli, Oé-Cusse, kinta ne’e.

Nia informa, tipu formasaun ne’ebé hala’o iha Sentru Formasaun Bansone hamutuk área-lima (5) hanesan soldadura, karpinteiru, kanalizasaun, eletrisidade no mós ospitalidade inklui área agrikultura nian.

Nu’udár responsabél másimu iha SEFOPE, nia apela ba formandu sira atu pasiensia hodi hein atu kontinua estuda tanba daudaun ne’e sei hein orientasaun hosi autoridade RAEOA bainhira mak re-ativa formasaun ne’e.

Entretantu, totál formandus ne’ebé partisipa iha Sentru Formasaun Bansone hamutuk 65 ne’ebé kompostu hosi área konstrusaun jerál hamutuk 50 no área agrikultura hamutuk 15.

Jornalista : Abílio Elo Nini

Editór      : Cancio Ximenes

HAKEREK NO HATÁN

Please enter your comment!
Please enter your name here