Koordenadór eskola Ensinu Báziku Filiál (EBF) Defalasi, suku Nahareka, postu administrativu Ossu, munisípiu Viqueque, José Mário da Silva. Imajen Tatoli/Vitorino Lopes da Costa.

VIQUEQUE, 16 Setembru 2021 (TATOLI)—To’o oras-ne’e eskola Ensinu Báziku Filiál (EBF) Defalasi, suku Nahareka, postu administrative Ossu, munisípiu Viqueque, iha de’it profesór na’in-ida mak hanorin.

José Mário da Silva, hanesan Koodenadór no hanesan mós profesór iha eskola ne’e, preokupa ho situasaun ne’e tanba, bainhira nia ba Dili, tenke sakrifika estudante-sira labele tuir aula.

Notísia relevante:MEJD inaugura pré-eskolár Nahareka ne’ebé konstrui hosi Nova Zelándia

Nia mós aproveita hodi aprezenta ona situasaun ne’e ba Vise-Ministru Edukasaun Joventude no Desportu (MEJD), António Guterres, bainhira hala’o vizita ba eskola ne’e, iha kinta ne’e.

“Eskola ne’e ha’u mesak mak hanorin, asume mós kargu hanesan koordenadór, ne’ebé kuandu sai ba enkontru ruma, tenke abandona estudante-sira. Ida-ne’e, ha’u sente hanesan difikuldade boot ba ha’u no estudante-sira,” nia hateten.

Oras-ne’e daudaun iha estudante hamutuk na’in 22, nune’e husu Governu atu halo rekrutamentu ba profesór na’in-tolu hodi ajuda hanori matéria sia ba estudante-sira.

Alende ne’e, nia husu mós apoiu Governu atu bele kompleta mobiliáriu eskola nian hanesan meza no kadeira, tanba agora dodok hotu.

Kona-bá ne’e, Vise-MEJD, António Guterres afirma, Governu iha responsabilidade atu tau-matan duni ba kondisaun eskola hotu-hotu iha territóriu tomak, inklui sira ne’ebé iha área remota.

“Eskola ne’e iha área remota liu, ne’ebé ha’u hateten Governu iha responsabilidade hodi haree inklui rekursu umanu. Koordenadór eskola hato’o ona karta ba serbisu edukasaun munisípiu, ha’u rona preokupasaun katak, profesór ida de’it ne’e labele no tenki aumenta, mínimu na’in-rua,” nia promete.

Eskola EBF Defalasi Filiál hosi eskola Ensinu Báziku Sentrál Nahareka, no eskola ne’e harii iha 2008 hodi akumula estudante hosi aldeia rua mak hanesan, Makabu’u no Mau Rate hosi suku Nahareka.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here