Primeiru-Ministru, Taur Matan Ruak. Imajen TATOLI/Egas Cristóvão

DILI, 16 setembru 2021 (TATOLI)—Primeiru-Ministru, Taur Matan Ruak, hateten tempu badak sei reuni ho (Komisaun Administrasaun Fundu Infraestrutura(KAFI) atu sira implementa osan fundu infraestrutura no aselera prosesu rekonstrusaun liu-liu destroisaun sira hosi siklone tropikál seroja ne’ebé akontese iha 4 abril 2021 ne’e.

Notísia Relevante: KAFI hahú diskute planu infraestrutura hodi orsamenta iha tinan oin

“Preokupasaun hotu-hotu nian, ha’u alerta beibeik ona ho ha’u-nia ministru sira, espera katak iha tempu badak ha’u sei reuni ho KAFI atu sira implementa fundu infraestrutura no aselera prosesu rekonstrusaun liu-liu destroisaun sira hosi dezastre naturál ne’ebé akontese iha 4 abríl liubá ne’e,” Primeiru-Minsitru hateten ba jornalista sira hafoin hala’o enkontru semanál ho Xefe Estadu Francisco Guterres Lú Olo iha Rezidénsia Faról, kinta ne’e.

Xefe Governu espera katak KAFI halo esforsu atu fó kontribuisaun ida, tanba se la’e udan ne’ebé mai invez sobu de’it foun no sobu mós sira-ne’ebé tuan tiha ona ne’e, aumenta kustu no aumenta ninia gravidade entaun ne’e preokupasaun ida.

Antes ne’e, udan boot ne’ebé akontese iha 04 abríl liubá ne’ebé hamosu inundasaun boot iha Dili halo Xefe Governu tun direta halo observasaun ba situasaun ponte Becusse, ne’ebé dehan atu sobu maibé to’o agora seidauk sobu no halo hikas ponte foun.

Sidadaun afetadu sira-ne’ebé kontinua hela iha lona okos ne’e, Xefe Governu hateten, ida-nee preokupasaun ida no nia parte fó hanoin Ministériu Estatal Administrasaun (MAE) haree hela dalan halo nusá mak fó asisténsia ba vítima afetadu sira-ne’e.

Ba fatin risku inundasaun, nia dehan, Governu la admite vítima afeatadu sira fila-fali ba hela iha sira-nia fatin, tanba se lae sira hela tan iha sira-nia uma no tinan oin inundasaun mosu fali, sira sei fila-fali mai.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here