Diretór Dirasaun Nasionál Finansa Públika (DNFP), Egídio de Jesus. Imajen TATOLI/ Osória Marques.

DILI, 16 setembru 2021 (TATOLI)—Diretór Dirasaun Nasionál Finansa Públika Ministériu Administrasaun Estatál (DNFP-MAE), Egídio de Jesus Alves, informa hosi janeitu to’o 16 setembru ne’e MAE ezekuta ona 56.45% hosi Orsamentu Jerál Estadu (OJE) 2021 ho totál millaun $54.

Notísia Relevante: OJE 2021, MAE ezekuta ona 48%

“Hahú janeiru to’o 16 setembru ne’e, ami ezekuta ona OJE 2021 bazea ba sistema atinje ona 56.45% ho osan $30.487.189,25 no osan balansu sei iha $6.433.308,14 hosi osan alokasaun hamutuk millaun $54,” Diretór DNFP ne’e hatete ba Agência TATOLI, iha nia knaar fatin, Colmera, Dili, kinta ne’e.

Hosi osan $30.487.189,25 ne’e, nia informa, saláriu no vensimentu aloka $3.715.695 no ezekuta ona mak hamutuk $2.382.724 (64.13%); bens no servisu aloka $10.906.742,75 no ezekuta ona hamutuk $2.833.826,70 (25.98%); kapitál menór aloka $4.823.512 no ezekuta ona mak $1.229.419 (25.49%); kapitál dezenvolvimentu aloka orsamentu hamutuk $330.000 maibé nia ezekusaun sei zero hela no transferénsia públika aloka osan $34.235.049 no osan ne’ebé mak ezekuta ona hamutuk $24.041.219,55 (70.22%).

“Kona-ba ezkusaun ba kapitál dezenvolvimentu ne’ebé sei zero tanba ita sei hein dezeñu BoQ hosi Ajénsia Nasionál Dezenvolvimentu (AND) no BoQ ne’e ita submete kleur ona maibé to’o agora seidauk iha resposta. Ida-ne’e mós sai problema ida ba MAE, nune’e ita labele ezekuta. Tuir loloos ita atu harii Cobe House iha oin hodi dirasaun foun balun bele uza maibé seidauk iha rezultadu,” nia hateten.

Hosi transferénsia públika ne’ebé mak ezekuta ona mak $24.041.219,55, osan ne’e maiória ba Programa Nasionál Dezenvolvimentu Suku (PNDS), konstrusaun ba Uma Kbiit Laek (UKL), inklui rehabilitasaun sede suku no mós programa mão de obra.

Ezekusaun ne’e prioridade liu ba programa jéneru, boa governasaun no jestaun institusionál, desentralizasaun administrativa, organizasaun urbana, administrasaun eleitorál, programa konservasaun dokumentu istóriku no dezenvolvimentu retornu báziku.

“Hosi osan saláriu no vensimentu ne’e, ami selu ba funsionáriu 576 kompostu hosi mane 386 no feto iha 196 inklui diretór, xefe departamentu no asesór sira,” nia dehan.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here