Entudante sira lao ain fila ba uma hafoin halao limpeza iha sira nia eskola, sesta 16/7/2021.Imajen Tatoli /Antonio Goncalves

DILI, 16 setembru 2021 (TATOLI) – Ministériu Edukasaun Juventude no Desportu (MEJD) seidauk suspende hela ensinu aprendizajen aula prejensiál ba ensinu báziku no sekundáriu sira iha Dili to’o loron 30 setembru, hodi analiza mós situasaun pandemia Covid-19 iha Munisípiu Dili.

Diretór Jeral Ensinu Sekundáriu  Luis Fernandez, hateten to’o agora Ministru presiza halo analiza didi’ak molok foti desizaun. Prosesu analiza ne’e ministériu halo bazeia bá preparasaun saida maka eskola sira halo ona atu garante  prosesu aula prejensiál ba alunu sira.

“Klaru katak ita-nia prosesu ensinu aprendizajen aula prejensiál atraza. Ita sei la tuir ona kalendáriu normál. Maibé, ami nafatin iha kompromisu haree hela situasaun no kondisaun atu bele re-ativa fali atividade ensinu aprendizajen aula prejensiál iha Dili laran,” Luis Fernandez ba jornalista Agência Tatoli, iha Ministériu Edukasaun, Juventude no Desportu (MEJD), Vila Verde, Dili, kinta ne’e.

Nia esplika prosesu atu re-ativa aula prejensiál, eskola-sira tenke prienxe rekizitu hodi kumpre protokolu Organizasaun Mundiál Saúde  no Ministériu Saúde nian.

Ministériu Edukasaun tenke haree didi’ak kondisaun iha kada eskola sira ligadu ho protokolu saúde mundiál nian, inklui númeru vasinasaun hosi profesores sira atinje ona 90% ka lae.

Diretór Eskola Ensinu Sekundáriu Jerál (ESJ) Nicolau Lobato, Dili, Marcos Soares Pacheco, hateten eskola Nicolau Lobato rejista profesores hamutuk 32 inklui administrasaun na’in-ida,  guarda na’in-ida  no cleaner na’in-ida

“Ami nia profesór permanente na’in-sia (9) simu ona vasina, profesór kontratadu 10 falta na’in-ida  mak seidauk vasina tanba moras komplikadu no voluntáriu na’in-12, na’in-tolu (3) seidauk vasina tanba inan fó susu,” nia informa.

Marcos afirma katak dadus profesores sira ne’e submete hotu ona bá Dirasaun Servisu Edukasaun Munisípiu Dili ne’ebé hein de’it kondisaun saúde profesores sira nian kuandu di’ak ona sira bele simu ona vasina.

Jornalista : Tomé Amado

Editór       : Francisco Simões

HAKEREK NO HATÁN

Please enter your comment!
Please enter your name here