Ministru Asuntu Parlamentár no Komunikasaun Sosiál (MAPKOMS), Francisco Jerónimo ho ekipa hala’o sensibilizasaun ba vasina kontra COVID-19 iha suku Madebenu, postu administrativu Laulara, munisípiu Aileu, kinta (16/09/21). Imajen Tatoli/Nelson de Sousa.

AILEU, 16 setembru (TATOLI)—Komunidade iha suku Madebenu, postu  administrativu Laulara, munisípiu Aileu, prontu atu simu vasina ne’ebé rekomenda hosi Governu hodi kontra COVID-19.

Xefe Suku Madebenu, Afonso Marques Henrique, deklara prontidaun ne’e bainhira Ministru Asuntu Parlamentár no Komunikasaun Sosiál (MAPKOMS), Francisco Jerónimo ho ekipa hala’o sensibilizasaun ba vasina kontra COVID-19 iha suku ne’e, kinta ne’e.

Notísia relevante:MD kontinua enkoraja populasaun Bobonaro simu vasina

Autoridade lokál ne’e hamutuk ho populasaun kontente tanba ministru tun direta iha komunidade nia leet, hodi esplika vantajen no objetivu loloos  hosi vasina ne’e.

“Ami orgullu tanba Ministru bele mai esplika no komunidade tau konfiansa sei koopera ho líder-sira atu simu vasina,” nia hateten.

Nune’e mós, komunidade António Alecio Amaral, kontente ho sensibilizasaun ne’ebé esplika importánsia hosi vasina, tanba durante ne’e rona informasaun falsu barak  liu.

Alende ne’e, Teresa  Cardoso Pereira, deklara prontu atu simu vasina tanba rona ona esplikasaun klara, no durante ne’e seidauk simu vasina tanba dúvida no tauk.

Ministru MAPKOMS, Francisco Jerónimo, hateten Estadu iha programa hodi halo preparasaun oinsa salva ema hotu hosi COVID-19, ne’ebé hamate ona ema tokon 4-resin iha mundu no ema  na’in 92 mak mate iha TL.

Dalan úniku atu fó protesaun maka, komunidade iha devér no obrigasaun koopera ho Estadu, hodi hakbesik an ba postu saúde hodi simu vasina, nune’e isin forte, hasa’e imunidade hodi proteje an, família, sosiedade  no nasaun.

Administradór Aileu, Abel da Conceição relata, tuir estatístika nasionál munisípiu ne’e partisapsaun sei menus kompara ho munisípiu seluk.

Tanba ne’e, orientasaun no  avaliasaun ne’ebé iha maka, iha Laulara fasilita ona postu vasinasaun ba kada suku hodi komunidade habkesik an atu simu vasina, maibé bainhira la atinji númeru vasina, maka sei halo ho mekanizmu seluk hodi hakat to’o ba komunidade ida-idak nia hela fatin.

Diretór Serbisu Saúde Munisipál Aileu, Júlio dos Santos, hateten populasaun alvu iha Madebenu hamutuk 400, maibé foin vasina doze dahuluk no segundu iha  na’in 190.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here