Jornalista no lokutora Ercilia do Rosaria Name iha Rádio Comunidade Atoni Lifau (RCAL) hakotu iis. Imajen/Espesiál.

OÉ-CUSSE, 16 setembru 2021 (TATOLI)—Rádio Comunidade Atoni-Lifau (RCAL) iha Rejiaun Administrativa Espesiál Oé-Cusse Ambeno (RAEOA), lakon nia jornalista no lokutora ,Ercilia do Rosaria Name, ne’ebé hakotu iis iha Hospitál Referénsia Oé-Cuse iha tuku 23:00 kalan tanba sofre moras kankru.

Jestór RCAL, José Francisco Efi, informa matebian hahú involve-aan iha vida jornalizmu iha Rádio Comunidade Atoni-Lifau (RCAL) iha tinan 2007.

Matebian nia prezensa hamosu ideia foun no sempre hamosu programa iha RCAL no to’o ohin loron uza nafatin mak programa “Hallo Enclave” no “Neop-Feto Neo-Monik” ka “Ideia Foun ba Família” inklui programa kontaktu direta.

Jornalista no lokutora Ercilia do Rosaria Name iha Rádio Comunidade Atoni Lifau (RCAL) hakotu iis. Imajen/Espesiál.

“Nia memória sira rai hela ba RCAL no uza iha rádiu. Ha’u sente triste tanba lakon kolega di’ak ida-ne’ebé mak durante ne’e servisu nu’udár jornalista kleur tebes iha Rádio Comunidade Atoni Lifau. Nia kontribui maka’as kria programa barak iha prosesu dezenvolve Rádio ne’e la’o durante ne’e. Nia mós involve direta iha parte finansa ninian. Ha’u sente lakon ha’u-nia kolega di’ak,” Jestór RCAL, José Francisco Efi, hateten ho mataben hodi informa ba Agência Tatoli, iha sstudiu RCAL Oésono Oé-Cusse, kinta ne’e.

Matebian hahú nia karreira jornalizmu iha RCAL iha tinan 2017 no  primeira feto ida-ne’ebé servisu ho enerjia, iha abilidade di’ak no koñesimentu iha aspetu oioin.

Tanba, nia dehan, ho ninia prezensa konsege dezenvolve rádiu ne’e iha Oé-Cusse ho garantidu no seguru, tanba programa barak nia lansa no promove iha mídia ne’e hosi aspetu oioin.

“Matebian Ercilia nu’udár mós responsavél administrasaun ninian, maibé sai hanesan lokutora ne’ebé kualidade iha RCAL tanba nia abilidade multi-talenta. Tanba ne’e, hanesan jestór RCAL, ha’u sente laran moras tanba lakon ha’u-nia ema ida-ne’ebé di’ak tebes,” nia dehan.

Jestór ne’e hateten, molok matebian sofre moras ne’e, matebian informa husu lisensa tanba hetan moras kankru no konsulta duni iha ospitál maibé ikus Maromak hadomi liu no bolu nia ba Maromak nia uma.

Matebian Ercilia do Rosaria mate ho idade 34. Matebian moris iha sub-rejiaun Nitibe, suku Usitaco, 25 maiu 1986. Nia mate husik hela oan na’in-haat (4) kompostu hosi feto-rua (2) no mane-rua (2) ho otas sei labarik.

Matebian hahú hala’o nia estudu iha eskola Primaria Baoknana, sub-rejiaun Nitibe, kontinua eskola Pre-sekundária no sesundária iha eskola St. Antonio Oé-Cusse, no iha tinan 2015 ramata universidade iha Dili Institute of Tekhnology (DIT) Deprtamentu Computer Science.

Tuir Familia matebian, Beti do Rosaria Name, haktuir kronolojia matebian hakotu iis tanba sofre moras kankru kuaze tina-rua ona.

Matebian konsege halo tratamentu iha Hospitál Referensia Oé-Cusse maibé to’o matebian hakotu iis iha loron kurta (15/09) kuaze tuku 23:00 kalan. 

Jornalista : Abílio Elo Nini

Editór      : Cancio Ximenes

1 KOMENTÁRIU

  1. Eee aokbian mana Erci.. Neka namen umnauko.. Nuakit tefes manekun lo ala.manit konta istoria..maske hau sei dok mos o nia hamnasa haksolok halo hau kontenti fahe hanoin maske minutu hira… Deskansa ho dame no agora mana la terus ho moras ne ona.. Maromak hadomi liu mana. Onen matulun he Usi hatain ho mone nok ho ana sin ma familia ok oke.siom Usi in planu i..
    Adeus amiga diak…

HAKEREK NO HATÁN

Please enter your comment!
Please enter your name here