DILI, 16 setembru 2021 (TATOLI)—Hahú fulan janeiru to’o meiu fulan setembru, Laboratóriu Nasionál Saúde (LABNAS), rekolla $310.117,40 ba kofre Estadu.
Reseita ne’e mai hosi fontes tolu mak hanesan teste COVID-19, Tubercoloze, no Mikrobiolojia, hahú 01 janeiru to’o 25 marsu, iha $73.460,70.
Notísia relevante:Kada loron LABNAS iha kapasidade analiza amostra teste swab 700
Hahú hosi 26 to’o 31 marsu iha $ 35.240, hosi 01 to’o 16 abril iha $ 19.619,92 no 16 abril to’o 14 setembru, iha $ 181.796,78.
“Montante orsamentu reseita ne’e, barak liu mai hosi sira ne’ebé teste COVID-19 atu ba rai-liur, tantu timoroan no estranjeiru,” Diretór Serbisu Administrasaun Apoiu LABNAS, Libório da Costa Alves, hateten ba jornalista iha nia kna’ar fatin, Bidau, kinta ne’e.
Tarefa ba teste COVID-19, ekipa LABNAS halo la hanesan, ezemplu teste Polymerase Chain Reaction (PCR) ho kustu $35 ne’ebé presiza tempu loron-tolu mak bele foti rezultadu.
Tarefa seluk maka, Rapid ka GeneXpert no AustDiagnostic ho kustu $40 ne’ebé presija hein oras 24 to’o 48 mak bele foti rezultadu.
Iha mós tarefa ne’ebé fó de’it prioridade ba kazu urjente mak hanesan, teste PCR biofire ho durasaun tempu presija oras 24 ho presu $120.
Osan teste COVID-19 nian ne’e LABNAS rekolla bazeia ba diploma ministeriál konjunta ho númeru 34/MF no MS/09/2020, 7 outubru ba tarefa teste diagnóstiku surtu COVID-19 ne’ebé publika iha Jornál Repúblika.
Konteúdu hosi diploma ministeriál ne’e mak determina kustu sertifikasaun livre hosi COVID-19 ba Timoroan no ema estranjeiru ne’ebé hakarak halo viajen ba rai-liur.
Jornalista: Felicidade Ximenes
Editór: Cipriano Colo