Primeiru-Ministru, Taur Matan Ruak. Imajen TATOLI/Egas Cristóvão.

DILI, 16 setembru 2021 (TATOLI)—Primeiru Ministru, Taur Matan Ruak, hateten Governu servisu maka’as hela atu bele hetan vasina ba sidadaun idade 12 to’o 17, nune’e iha fulan-setembru hanesan ne’e bele komesa vasina ona.

Notísia Relevante: Governu deside sosa vasina Pfizer ba sidadaun idade 12 to’o 17

“Ita agora servisu maka’as hela depois hetan vasina ba ita-nia oan sira tinan 12 to’o 17. Se buat hotu di’ak, iha fulan-setembru nia laran ne’e bele komesa vasina ona, maibé depedende ita-nia esforsu no servisu. Ita tenke prepara sistema malirin nian, depois ba tuir vasina,” Taur Matan Ruak hateten ba jornalista sira hafoin hala’o enkontru semanál ho Xefe Estadu Francisco Guterres Lú Olo iha Rezidénsia Faról, Dili, kinta ne’e.

Xefe Governu ne’e hateten, iha vasina balun ne’ebé parseiru sira hakarak fó maibé balun ne’ebé Governu TL mós hakarak sosa atu sidadaun idade 12 to’o 17 ne’e sira hetan vasina, entaun númeru ka pursentu ema simu vasina ne’e aumenta maka’as loos.

Antes ne’e, Governu deside sei sosa tan vasina Pfizer ba sidadaun idade 12 to’o 17, nune’e sidadaun sira bele prevene aan hosi virus COVID-19 no variante seluk ne’ebé ameasa povu nia vida.

Entretantu, iha kuarta (16/09) Konsellu Ministru aprova ona projetu deliberasaun ida atu sosa vasina prevensaun COVID-19 ho marka Pfizer ba sidadadun sira ho idade 18 ba kraik (12-17).

Aleinde ne’e, Primeiru Ministru informa implementasaun kampaña nasionál vasinasaun iha territóriu Timor-Leste (munisípiu 13 tolu), munisípiu Dili mak avansadu liu tanba vasina doze dahuluk iha Dili kuaze 70% resin ona no doze daruak kuaze 60% resin.

Ida-ne’e akontese tanba Governu halo esforsu boot ida tanba dezde Governu TL simu vasina to’o agora simu ona 1.100.000 ne’e, implementa ona 80 mill resin, sei hela 200 mill, entaun vasina sei iha natoon ba sidadaun sira.

“Ami mós husu atu implementasaun kampaña vasinasaun ne’e lalais no mós husu apoiu populasaun sira-nian, atu sira bele kontribui. Hnesan ita iha munisípiu hotu-hotu, Dili mak avansadu loos. Dili primeira doze kuaze 70% resin no segunda doze kuaze 60% resin karik, se ha’u la sala númeru ladun fiksa,” Taur Matan Ruak hateten.

Maibé, nia dehan, se dehan to’o 80% nia bele tama normaliza primeira koiza ne’ebé normalizasaun ne’e ba munisípiu Dili.

Notísia relevante: TL sei simu doasaun vasina Pfizer doze 100.620

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here