Ministru Trasporte no Komunikasaun (MTK), José Agostinho da Silva. Imajen Tatoli/Francisco Sony

DILI, 16 setembru 2021 (TATOLI)–Ministru Transporte no Komunikasaun (MTK), José Agostinho da Silva, hateten, kompañia Ceslink hetan ona legalidade hosi Autoridade Nasionál Komunikasaun (ANC, sigla portugés) nu’udar operadór telekomunikasaun.

“Agora sira  (Ceslink) kumpre ona rekezitu, ho nune’e ha’u ohin hato’o ba Primeiru-Ministru, katak kompañia refere prenxe ona rekezitu adminiatrativa, téknika no legál, ho nune’e sira bele hetan sertifikadu rejistu nu’udar operadór telekomunikasaun dahaat iha Timor-Leste,” Ministru José Agostinho, informa, hafoin hasoru malu ho Xefe Governu, iha Rezidénsia Ofisiál, Farol, kinta ne’e. 

Notísia relevante: Ceslink Otimizta Re-inisia Prosesu Lisensa Operadór Telekomunikasaun iha Timor-Leste

Durante ne’e, ANC halo avaliasaun dokumetu hotu, ikus mai Konsellu Administrasaun autoridade aprova dokumentu kompañia nasionál ne’e.

“Sira prenxe ona rekezitu adminitrativa, téknika no legál tuir dekretu-lei númeru 15/2012,  artigu 30 ne’ebé maka sita rekezitu sira ne’ebé maka kompañia operadór telekomunikasaun tenke kumpre,” nia akresenta.

Baze legál ne’ebé maka ANC uza ba lisensiamentu maka dekretu-lei númeru 15/2012, ne’ebé iha kriteriu 14 maka kompañia operadór telekomunikasaun presiza kompleta, maibé ida importante liu atu kumpre maka rejistrasaun no lisensamentu operadór telekomunikasaun.

Nune’e mós, tenke kompleta dokumentu administrasaun, kapasidade finanseira atu halo funsaun hanesan operadór telekomunikasaun no kapasidade tékniku.

Tanba ne’e, nudar Ministru tutela ba área telekomunikasaun, Ministru José Agostinho halo audiénsia ho Xefe Governu atu entrega direta sertifikadu rejistu, nu’udar operadór telekomunikasaun dahaat iha Timor-Leste.

Maski nune’e, Ceslink presiza  kompleta tan rekezitu rua hanesan espetru no frekuénsia inklui rejistu utilizasaun númeru telemóvel.

“Governu nia atendimentu ba operadór sira ne’e justu, tantu ba Ceslink no operadór tolu seluk,” nia hatutan.

Antes ne’e, Governu liuhosi reuniaun Konsellu Ministru 20 fevereiru 2019, aprova proposta investimentu operadór telekomunikasaun Ceslink ne’ebé fó biban halo operasaun iha Timor-Leste maibé presiza kompleta rekezitu administrasaun balun.

Notísia relevante: Governu Aprova Investimentu Operadór Telekomunikasaun Ceslink

Iha aprezentasaun ba Governu, Ceslink halo konsórsiu ho investór konsórsiu Oka D’tel, Salvador Henrique koñesidu ho naran ‘Mauhoka’ maibé ikus mai hakotu kooperasaun ho Oka D’tel  no daudaun Ceslink iha ona parseiru foun atu funsiona hanesan operadór telekomunikasaun.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here