Diretora Jerál Polítika Planu Inkluzaun no Imprezaun MEJD, Odelia Martins. Imajen TATOLI/Natalino Belo

BAUCAU, 15 setembru 2021 (TATOLI)–Diretora Jerál Polítika Planu Inkluzaun no Imprezaun Ministériu Edukasaun Juventude no Desportu (MEJD), Odelia Martins, husu apoia inan-aman sira iha Baucau atu mobiliza oan sira partisipa iha planu implentasaun vasina ba estudante sira.

“Variante foun ne’ebé agora tama afeta maka’as ba labarik sira, entaun ita hakarak garante estudante sira labele infetadu moras COVID-19, tanba ne’e Governu hanoin ona atu fulan-setembru nia laran bainhira vasina to’o mai, alvu dahuluk ba estudante sira, nune’e presiza iha konsiénsia hosi inan-aman no família sira hotu atubele apoia oan sira simu vasinasaun nune’e prosesu aprendizajen la’o lalais,” Diretora Jerál, hateten, iha edifísiu Edukasaun Baucau, Villa nova, kuarta ne’e.

Daudaun ne’e MEJD liuhosi Servisu Edukasaun Munisipál kontinua rekolla dadus estudante sira ho idade 12 to’o 17, hodi simu vasina ho tipu Pfizer.

Notísia relevante: TL sei simu doasaun vasina Pfizer doze 100.620

Antes ne’e, MEJD husu profesor sira atu partisipa másimu iha kampaña vasina, nune’e bele atinje 75% inklui kumpre medida prevensaun hanesan fase liman, uza máskara no halo distánsiamente fíziku, inklui vasina ba estudante sira, nune’e aula prezensiál bele efetivu liután.

Nune’e, Servisu Saúde koordena ona ho Edukasaun Baucau, hodi daudaun ne’e hahú rekolla dadus liuhosi eskola hotu molok implementasaun kampaña vasinasaun ba estudante sira ne’ebé tuir planu sei realiza iha fulan-setembru ne’e.

Tuir dadus, munisípiu Baucau ho totál estudante hahú hosi ensinu pre-eskolar to’o ensinu sekundária téknika vokasionál hamutuk 41.255, profesor 2.200 resin, hosi totál eskola hamutuk 243.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here