Diretora STAE RAEOA, Luiza da Costa. Imajen Tatoli/Abílio Elo Nini.

OÉ-CUSSE, 15 setembru 2021 (TATOLI)—Sekretariadu Tékniku Administrasaun Eleitorál (STAE) Rejiaun Administrativa Espesiál Oé-Cusse Ambeno (RAEOA), daudaun ne’e hala’o atividade resensiamentu eleitorál no atualizasaun baze dadus iha suku hitu (7) iha sub-rejiaun Passabe no Nitibe.

Notísia Relevante: STAE RAEOA hala’o ona resenseamentu eleitorál iha Pante Makasar

“Ekipa ida iha sub-rejiaun Passabe atende suku Abani ho Malelat, ekipa ida iha Nitibe atende Usitaco, Bene-Ufe, Lela-Ufe, Ban-Afi no Suni-Ufe, atu halo resensiamentu eleitorál no atualizasaun baze dadus ba komunidade, bainhira ramata mak ekipa ida sei kontinua fali iha sub-rejiaun Oesilo,” Diretóra STAE RAEOA, Luiza da Costa, informa ba Agência Tatoli iha Palaban, Oé-Cusse, kuarta ne’e.

Bazeia ba kalendáriu resensiamentu eleitorál no atualizasaun baze dadus iha sub-rejiaun sira to’o fulan dezembru tinan ne’e, no ekipa rua-ne’e kada ekipa ida na’in-tolu (3) kompostu hosi operadór sistema, asistente téknika no pontu fokál.

Jestór sub-rejiaun Nitibe, Manuel Tolan, hateten ekipa STAE hala’o ona resensiamentu ba eleitór sira iha iha suku Usitaco hanesan produs kartaun eleitorál foun ba eleitór foun ho idade 17 no troka kartaun eleitóral ne’ebé aat no lakon.

Nia sujere, ba atendimentu resensiamentu eleitorál ba eleitór sira labele konsentra de’it iha Nitibe vila, tanba iha sub-rejaiun Nitibe iha suku lima (5) ho jeografikamente dook hosi Nitibe vila hanesan suku Ban-Afi, Lela-Ufe Usitaco parte foho nian.

Jornalista : Abílio Elo Nini

Editór      : Cancio Ximenes

 

HAKEREK NO HATÁN

Please enter your comment!
Please enter your name here