Sobrevivente (sasin matan ka sasin moris) Masakre Tumin, Crisviano Bobelo “Manu Mean” . Imajen TATOLI/Abílio Eo Nini.

OÉ-CUSSE, 15 setembro 2021 (TATOLI)—Sobrevivente Masakre Bobo-Ufe Tumin, suku Bobometo, sub-rejiaun Oésilo Rejiaun Administrativa Espesiál Oé-Cusse Ambeno (RAEOA) husu ba Governu dignifika povu nia moris ho dezenvolvimnetu hodi hakbesik ba povu iha área rurál.

Notísia Relevante: Sobrevivente rekomenda ba Governu konstrui monumentu iha semitériu Tumin

Sasin Matan, Crisviano Bobelo, hateten tinan 22 Masakre Tumin akontese no Timor-Leste ukun rasik-aan tinan 19 ona maibé povu balun de’it mak sente iha mudansa iha sira-nia moris maibé povu balun seidauk sente hosi rezultadu ukun-aan ida-ne’e tanba líder sira lahamutuk.

“Situsaun ida-ne’e mosu tanba lidér nasionál lahamutuk, tanba ida-idak defende partidu politiku hodi kontra malu no hamonu malu, ikus mai povu mak terus. Maibé, uluk funu kontra invazór, sira hamutuk to’o manan, entaun ohin loron sira tenke hamutuk nafatin atu lori ita-nia dezenvolvimentu to’o baze atu hakbesik ba komunidade,” Crisviano Bobelo hateten ba Agência Tatoli iha Palaban, Oé-Cusse, kuarta ne’e.

Buat ne’ebé povu no sobrevivente Masakre Tumin mehi ba Timor-Leste nia dezenvolvimentu iha future mak Governu no Estadu Timor-Leste presiza hakbesik liután dezenvolvimentu ba povo iha baze, lori dezenvolvimentu hosi leten tun mai to’o povu iha baze.

Tanba, nia dehan, nasaun Timor-Leste ne’e harii hosi ruin no raan entaun Governu tenke tau prioridade ba povu nia moris di’ak, tanba komunidade ne’ebé moris iha área ruurál ne’e sira-nia moris enfrenta problema barak hanesan elektrisidade, bee-moos, estrada, saúde, loke eskola to’o fatin izoladu sira iha suku no aldeia, nune’e fasil ba ema hotu asesu edukasaun.

Notísia Relevante: Masakre Tumin: “Subar kalan haat, ha’u-nia kanek ne’e ular hotu”

Nia sujere ba lídér istoriku sira hanesan aman ba nasaun ho ho fuan boot no aten-berani hamutuk kria unidade no pás hodi haree povuu nia moris ba asesu ekonomia nian, liu-liu ho situasaun atuál presiza hamutuk rezolve no kombate moras COVID-19, siklone tropikál seroja ne’ebé akontese iha 04 abril, ne’ebé afeita maka’as ba patrimonia komunidade no Estdau nian.

Sobrevivente Masakre Tumin, Marcus Baquin, hateten povu Timor-Leste nia mehi iha tempu okupasaun hakarak haketak-aan hosi Indonézia tanba halo povu sai atan iha nia rain rasik hodi ladun asesu ba edukasaun, asesu ba dezenvolvimentu hanesan eletrisdade, estrada, saúde.

“Ha’u husu ba líder sira labele fahe malu tán no husu ba governante sira hamutuk hodi habelar nafatin dezenvolvimentu ba komunidade iha área remota liu-liu konstrui ponte, estrada, fasilidade saúde bele fasílita komunidade sira nia sirkulasaun no bele asesu ba sáuda,” nia hateten.

Notísia Relevante: Masakre Tumin: “Milísia tá ha’u-nia ibun, nehan tohar monu namtate”

Jornalista : Abílio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here