Eis Prezidente Repúblika Portugál Jorge Sampaio. Imajen/Espesiál.

DILI, 15 setembru 2021 (TATOLI)–Parlamentu Nasionál kuarta ne’e aprova votu pezár ba Eis Prezidente Repúblika Portugál Jorge Sampaio hodi rekoñese saudozu nia kontribuisaun ba Povu no rai Timor-Leste iha prosesu luta ba indepedénsia.

Reprezentante povu sira aprova hotu pezár ne’e ho rezultadu votasaun a-favór 55, kontra 0 no abstensaun 0.

Notísia Relevante: 15 setembru, PN sei aprova votu pezár ba Jorge Sampaio

“Votu pezár ba Joerge Sampaio aprovadu, nune’e mai hato’o minutu ida ho silénsiu,” Prezidente Parlamentu Nasionál Ein-Ezersísi, Deputada Maria Angelina Lopes Sarmento, anunsia liuhosi plenária.

Vise-Xefe Bankada FRETILIN, Deputadu Antoninho Bianco, hato’o sentida kondolénsia ba antigun Prezidente Repúblika Portugueza ne’e.

“Líder polítika ida-ne’ebé fó kontribuisaun boot tebes ba ita-nia rain, tanba nia mandatu mak konsege asina akordu 05 de maiu, ne’e mak ita presiza ita-nia istória no valoriza mós eis xefe estadu portugés ne’e,” Vise-Xefe Bankada FRETILIN, Deputadu Antoninho Bianco, ko’alia iha plenária.

Nune’e mós Vise-Xefe Bankada CNRT, Deputadu Patrocínio dos Reis Fernandes, sente triste bainhira rona informasaun kona-ba eis xefe Estadu ne’e hakotu iis.

“Líder polítiku ne’ebé merese duni Parlamentu Nasionál aprova votu pezár,” nia hato’o sentida kondolénsia ba Jorge Sampaio.

Vise-Xefe Bankada KHUNTO, António Verdiál de Sousa, haree ba iha kestaun polítika nian, antigu Prezidente Repúblika Portugueza Jorge Sampaio, internasionalmente figura ida-ne’ebé importante tebes iha altura ne’ebá luta no fó mós nia kontribuisaun maka’as ba Timor-Leste.

“Ohin loron ita hetan mós ita-nia independénsia ka Ukun Rasik’an, tanba eis Prezidente Repúblika ne’e mós fíar iha independénsia Timor-Leste ninian. Fiar katak ita laiha ona mundu ne’e maibé Timor-Leste sei la haluhan iha ami nian memória tomak,” nia subliña.

Eis Prezidente Repúblika Jorge Sampaio mate iha loron sesta liubá ho idade tinan 81, tanba hasoru difikuldade respiratória iha loron 27 agostu no transfere ba Lisboa.

Jorge Fernando Branco de Sampaio moris iha Lisboa iha 18 setembru 1939. Oan hosi Arnaldo Sampaio, ne’ebé koñesidu nu’udar médiku iha saúde públika, no Fernanda Bensaúde Branco de Sampaio, nu’udar profesora lian inglés.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here