Diretór Servisu Edukasaun munisipál Baucau, Augusto Ornai Ximenes. Imajen TATOLI/Natalino Belo

BAUCAU, 15 setembru 2021 (TATOLI)–Diretór Servisu Edukasaun munisipál Baucau, Augusto Ornai Ximenes, hateten, liuhosi enkontru ho Prezidente Autoridade Munisípiu (PAM), mosu rekomendasaun ba Ministériu Edukasaun Juventude no Desportu (MEJD) atu reativa hikas aula prezensiál.

“Autoridade Munisipál halo enkontru konjunta ona ho parte hotu inklui Sentru Intergradu Jestaun Krize (CIGC, sigla portugés) no fó ona rekomendasaun no pareser téknika ba MEJD ne’ebé sita aprovasaun katak husu atu reativa prosesu aprendizajen aula prezensiál iha Munisípiu Baucau,” Diretór Edukasaun Baucau informa iha ninia knaar fatin, kuarta ne’e.

Tuir Diretor ne’e, pareser no rekomendasaun hosi Diresaun Munisipál haruka ona ba Gabinete MEJD, nune’e husu atu diretiva ensinu hotu atu hein desizaun hosi Governu sentrál.

Iha fatin hanesan, Diretora Jerál Polítika Planu Inkluzaun no Imprezaun MEJD, Odelia Martins, hateten, desizaun kona-ba reativa aula prezensiál iha Baucau tarde liu sei fó sai aban.

“Orsida lorokraik ministériu sei iha enkontru atu foti desizaun, ha’u hanoin tarde liu orsida lae aban iha ona desizaun,” Odelia akresenta.

Notísia relevante: Servisu Edukasaun suspende aula prezensiál durante serka sanitária iha Baucau

MEJD rasik sei akonpanã mos situasaun serka sanitária iha rejiaun Baucau, ne’ebé sei termina iha loron 22 setembru inklui persentajen vasinasaun profesor sira-nia inklui sei rekolla dadus estudante sira hosi tinan 12 to’o 17 atu partisipa iha vasina ho tipu Pfizer ne’ebé tuir planu sei realiza iha fulan setembru ne’e.

Antes ne’e, MEJD fó sai despaixu ministérial númeru 44 kona-ba suspensaun provizóriu atividade aula prezensiál iha Baucau to’o iha loron 10 setembru relasiona ho pandemia iha rejionál ne’e.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here