Ministru Ensinu Superiór, Siénsia no Kultura (MESSK), Longuinhos dos Santos. Imajen Tatoli/ Egas Cristóvão

DILI, 15 setembru 2021 (TATOLI) – Ministru Ensinu Superiór Siénsia no Kultura (MESSK), Longuinhos dos Santos, enkoraja nafatin dosente no estudante sira iha instituisaun ensinu superiór públiku no privadu atu simu vasina kontra COVID-19  hodi garante atividade aula prejensiál.

Bazeadu rekomendasaun hosi MS nian autoriza atividade aula prejensiál iha Instituisaun Ensinu Superiór tantu públiku no privadu, maibé labele haluha kumpre protokolu saúde publika nian  nian kona-ba prevensaun COVID-19.

“Fase-liman ho sabaun uza hands sanitizer, kumpre distánsia sosiál, uza máskara no kontínua dezinfeta aula sira hodi prevene moras labele hada’et bá ema seluk,” Ministru Longuinhos bá jornalista sira iha Palásiu Governu ,kuarta ne’e.

Membru Governu ne’e afirma katak bá estudante ne’ebé seidauk vasina, tuir akordu instituisaun nian sei laiha direitu atu hetan aula prejensiál. Medida ne’e la’ós obrigatóriu maibé rekejitus ida atu ajuda hodi evita moras COVID-19 ne’e labele da’et bá ema seluk.

Reitór Universidade da Paz (UNPAZ), Adolmando Amaral esplika dosente no funsionáriu UNPAZ maioria hetan hotu ona vasinasaun segundu doze. Agora bá estudante sira maka hosi totál 9.176, universidade husu atu asesu mai kampus tenke simu lai vasinasaun.

“Ita iha dadus estudante ne’ebé vasina tuir programa Ministériu Edukasaun nian iha kampus ne’e purvolta rihun 3-resin agora ba sira seluk la vasina iha kampus ka seidauk vasina, ita husu nafatin atu kumpre rekizitu sira ne’e,” nia tenik.

Jornalista : Tomé Amado

Editór       : Francisco Simões

HAKEREK NO HATÁN

Please enter your comment!
Please enter your name here