Atividade sosializasaun programa tele-eskola, iha edifísiu Edukasaun Baucau, Villa nova, kuarta (15/09). Imajen TATOLI/Natalino Belo

BAUCAU, 15 setembru 2021 (TATOLI)—Ministériu Edukasaun Juventude no Desportu (MEJD) sosializa programa tele-eskola hodi parte eskola bele aproveita fahe informasaun ba komunidade, liuliu ba inan-aman no estudante kona-ba matéria aprendizajen liuhosi kanál ne’ebé prepara ona.

Tuir Diretora Jerál Polítika Planu Inkluzaun no Imprezaun MEJD, Odelia Martins, sosializasaun ne’e destina ba diretór ensinu báziku sira.

Diretora Jerál Polítika Planu Inkluzaun no Imprezaun MEJD, Odelia Martins. Imajen TATOLI/Natalino Belo

“Alvu mak profesor sira. Ami hanoin ho prezensa koordenadór no diretór eskola sira bele hatutan fali ba profesor seluk atu hatene kona-ba prosesu fahe informasaun, liuliu utiliza kanál ba matéria sira ne’ebé upload ona iha YouTube no programa seluk ne’ebé mídia nasionál sira fó sai,” Diretora Jerál hateten iha edifísiu Edukasaun Baucau, Villa nova, kuarta ne’e.

Tanba ne’e, liuhosi sosializasaun, profesor sira bele hatutan ba komunidade atu fasilita oan sira atu asesu informasaun, hanesan entrega telemóvel oras balun ba oan sira atu utiliza akompaña programa no haree televizaun no rádiu bainhira programa tele-eskola sai.

Objetivu atividade ne’e, hodi entidade edukasaun sira hatene prosesu aprendizajen distánsia ka online, ho hanoin ida katak durante pandemia, ho desizaun Governu ba implementasaun serka sanitária no konfinamentu domisiliáriu, estudante sira hela iha uma.

“Governu hanoin tenki kria mekanizmu hodi responde ba situasaun hirak ne’e, nune’e tulun estudante sira atu kontinua akompaña prosesu aprendizajen liuhosi kanál YouTube, televizaun no rádiu,” nia akresenta.

Aleinde ne’e, programa tele-eskola atu implementa mós ba profesor sira tanba MEJD konsidera manorin sira mak ema ne’ebé akompanã prosesu aprendizajen virtuál, tanba ne’e tenke apar ho mekanizmu atu asesu.

“Hafoin hala’o avaliasaun, númeru estudante ne’ebé asesu programa pur volta 25% to’o 30% de’it, nune’e MEJD tenta halo sosializasaun maka’as liután ba manorin no komunidade sira atu akompanã nafatin,” nia hatutan.

Governu kontinua tenta reforsa liután programa eskolár liuhosi tele-eskola hodi akompanã estudante sira durante prosesu aprendizajen iha situasaun pandemia.

“Maski ho númeru la boot liu, maibé ita haree katak interese estudante sira atu asesu ba programa ne’e iha, maibé difikuldade mak rede internet, estudante barak laiha telefone ne’ebé suporta programa, no laiha televizaun,” Odelia katak.

Atividade ne’e partisipa hosi diretiva hosi ensinu báziku iha Baucau inklui Diretór Edukasaun munisipál.

Jornalista : Natalino Belo

Editora      : Julia Chatarina

HAKEREK NO HATÁN

Please enter your comment!
Please enter your name here