Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (15/09). Imajen TATOLI/Egas Cristóvão

DILI, 15 setembru 2021 (TATOLI)–Governu Timor-Leste liuhosi Ministériu Agrikultura no Peska (MAP) sei selebra akordu ida ho Ajénsia Kooperasaun Internasionál Koreia (KOICA, sigla inglés) atu hadi’a sekuénsia valór agrikultura.

“Akordu ne’e sei hala’o entre tinan 2021 to’o 2025 no sei prevee mós asisténsia téknika no fornesimentu materiál sira hosi KOICA ho valór millaun $6,” Ministru Prezidénsia Konsellu Ministru, Fidelis Manuel Leite Magalhães, relata, hafoin reuniaun ezekutivu iha Palásiu Governu, kuarta ne’e.

Ba kestaun ne’e, KM fó podér tomak ba Ministru Agrikultura no Peska, Pedro dos Reis, atu asina akordu ida-ne’e.

Nune’e, projetu ne’e sei kontribui hasa’e setór agríkola no ortikultura ho objetivu atu hasa’e produtividade iha área prioritária sira.

“Inisiativa ne’e bele estabelese infraestrutura produsaun agríkola no hasa’e kapasidade produsaun, nune’e permite asesu ba merkadu produtu lokál, hadi’a instalasaun venda no distribuisaun, inklui kapasidade komersializasaun agríkola nian,” Ministru akresenta.

Antes ne’e, KOICA fó ona materiál no halo moru ba sentru haki’ak ikan iha munisípiu sira.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here