Membru Parlamentu Nasionál kanta Ino Nasionál “Patria, Patria!” molok hala’o abertura ba sesaun lejizlativa foun (dahaat) V Lejizlatura Parlamentu Nasionál, iha salaun Plenaria Parlamentu Nasionál, kuarta (15/09). Imajen Tatoli/Francisco Sony.

DILI, 15 setembru 2021 (TATOLI)–Sesaun lejizlativu datoluk termina ho tama ona lejizlativa dahaat iha lejizlatura dalima, nune’e Bankada Frente Revolusionária Timor-Leste Independente (FRETILIN) husu deputadu sira halo reflesaun.

Notísia Relevante:  Bankada PD levanta problema tolu iha abertura sesaun lejizlativa dahaat

“Ohin, ami nu’udar reprezentante povu mai hamutuk fali dala-ida tán iha uma-fukun povu nian, hodi loke Sesaun Lejizlativa ba dala-haat iha V Lejizlatura. Momentu ida importante tebes ba ita hotu nu’udar reprezentante povu, nu’udar ‘polítiku’ ita presiza halo ‘ponto de refleção’ ba ita-nia Estadu ne’ebé ita hakna’ar nu’udar ‘polítiku’ iha rai-doben ida-ne’e,” Xefe Bankada FRETILIN, Deputadu Francisco Miranda Branco, ko’alia iha sesaun lejizlativa foun, iha uma fukun, kuarta ne’e.

Razaun, nia esplika, hafoin tinan 20 liutiha Timor-Leste kaer rasik kuda talin, timor-an sira gasta ona biliaun $14 mais billiaun $3 hamutuk biliaun $17 hodi hatuur loloos timor-oan nia polítika ba povu no ba nasaun nia ‘bem-estar’ no prosperidade.

 Bankada FRETILIN iha Sesaun Lejislativa dahaat nu’udar rohan ba Lejizlatura dalima nian, mantein postura polítika atu viabiliza VIII Governu Konstitusionál to’o mandatu ramata, tuir konstituisaun no tuir vontade povu nian tanba nanis kedas FRETILIN hakribit hahalok ida sobu-harii no harii-sobu Governu sira.

Xefe Bankada FRETILIN ne’e hateten, iha sesaun Lejizlativa datoluk liubá hasoru difikuldade oioin no iha rejime duodésimu tempu naruk, iha limitasaun barak tanba COVID-19 no dezastre naturál ho inundasaun iha loron 04 fulan-abríl, maibé Parlamentu Nasionál iha V Lejizlatura nia produtividade lejizlativa konsege aas liu sesaun lejizlativa dahuluk no sira seluk.

Aktu lejizlativu hirak-ne’ebé prodús sesaun lejizlativa datoluk prodús lejizlasaun komún iha 14, autorizasaun lejizlativa iha rua (2), tratadu no asuntu rejionál hamutuk haat (4).

Parlamentu Nasionál halo mós eleisaun ba membru no titulár Komisaun Funsaun Públika, ba membru Konsellu Imprensa, ba membru efetivu, suplente nomós ba Prezidente Komisaun Nasionál Eleisaun nian.

Nune’e mós aprova Orsamento Jerál Estadu 2020, lei n°10/2020, iha loron 19 fulan-outubru no OJE 2021, ho lei n° 14/2020, iha loron 29 fulan-dezembru.

Iha sesaun lejizlativa datoluk ne’e aprova proposta-lei kona-bá Eleitorál ba Prezidente-Repúblika, Órgaun Administrasaun Eleitorál ho Resenseamentu Eleitorál, maske iha diferensa maibé konsege unanimidade aprova lejizlasaun ida-ne’e.

Iha sesaun lejizlativa datoluk ne’e, iha reforma judisiária hodi halo alterasaun ba Organizasaun Judisiária ne’ebé altera regulamentu UNTAET nian númeru 11 ho lei foun no hadi’a fila-fali Estatutu Ministériu Públiku nian no Estatutu ba Majistradu Judisiál, nune’e lori fila-fali konfiansa liután ba públiku nasionál no ba investidór internasionál sira ho reforma judisiária ida-ne’e.

Parlamentu Nasionál mós aprova ona Rejime Jurídiku Asosiasaun Públika Prosionál iha jeneralidade. Lei ida-ne’e nia substánsia estratéjika tebes, tanba sosiedade no profisionál barak mak presiza organiza sira-nia aan, no lakle’ur aprova tán lei Ordem ba Advogadu sira.

Prioridade ida mós ba Bankada FRETILIN mak polítika ba desentralizasaun podér lokál, fazeadamente tenke prodús polítika ordenamentu ba territóriu. Lei Podér Lokál nia prosesu hahú hosi I Lejislatura, ho 1o Governu Konstitusionál no sei hakotu iha V Lejislatura hosi VIII Governu Konstitusionál hodi bele implementa iha tempu tuirmai.

Parlamentu Nasionál halo ona buat barak iha sesaun lejizlativa sira liubá, maibé presiza esforsu-aan nafatin hodi serví povu no Estadu Timor-Leste ho di’ak.

Bankada FRETILIN espera sesaun lejizlativa foun bele hetan susesu no produtividade liután tuir mandatu konstitusionál, hodi prodús lei, halo fiskalizasaun ba aktu ezekutivu nian no hola desizaun polítika ba hametin prosesu konstrusaun Estadu.

Notísia Relevante: Bankada CNRT preokupa ministériu hotu-hotu konsentra de’it ba COVID-19 

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here