Ajénsia Kooperasaun Internasionál Koreanu (KOICA) ho Organizasaun Mundiál ba Saúde (OMS), oferese kama 500 ba Ministériu Saúde (MS) iha Palasiu das Sinzas, Caicoli, kuarta (15/09/21. Imajen MS.

DILI, 15 setembru 2021 (TATOLI)—Ajénsia Kooperasaun Internasionál Koreanu (KOICA) ho Organizasaun Mundiál ba Saúde (OMS), oferese kama 500 ba Ministériu Saúde (MS) atu kontribui ba prevensaun COVID-19 iha Timor-Leste (TL).

KOICA ho OMS mós oferese treinamentu ba pesoál saúde-sira kona-bá jestaun kazu COVID-19 moderadu no grave, ne’ebé tuir planu sei hala’o iha Ospitál Referál sira iha munisípiu lima.

Notísia relevante:Governu TL aprezenta progresu serbisu nutrisaun nian ba membru OMS

“Governu ho organizasaun ida de’it labele kombate pandemia ne’e, tanba ne’e tenke multisektorál,” Diretora KOICA iha Timor-Leste,  Cha Eunju, hateten iha serimónia hand over ba kama 500 ba MS iha palasiu sinzas, Caicoli, kuarta ne’e.

Iha fatin hanesan Reprezentante OMS iha TL, Arvind Mathur, hateten  tinan 2020, KOICA ho OMS fó apoiu ba MS hodi halo monitorizasaun no avaliasaun ba asaun prevensaun COVID-19 iha kada sentru saúde komunitária.

Kona-bá apoiu hirak ne’e, Diretora Jerál Prestasaun Serbisu Saúde, Odete da Silva Viegas, agradese ba OMS ho KOICA no parseiru sira ne’ebé oferese on aba Governu Timorense atu kontinua luta kombate virus ne’e.

Tuir planu, kama 500 ne’e MS sei distribui ba munisípiu-sira tuir kuantidade ne’ebé mak sira husu hanesan Covalima, Liquiça no Ermera.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here