Vise-Ministru Edukasaun Joventude no Desportu (MEJD), António Guterres, entrega edifísiu pré-eskolár komunitária ho sala-de-aula ida, ne’ebé konstrui hosi Governu Nova Zelándia iha aldeia Uaikai, suku Afaloikai, postu adiministrativu Uatulari, munisípiu Viqueque, kuarta (15/09/21). Imajen Tatoli/ Vitorino Lopes da Costa.

VIQUEQUE, 15 Setembru 2021 (TATOLI)—Governu Nova Zelándia konstrui edifísiu pré-eskolár komunitária ho sala-de-aula ida,  ho orsamentu $2.500, iha aldeia Uaikai, suku Afaloikai, postu adiministrativu Uatulari, munisípiu Viqueque.

Konstrusaun ba edifísiu ne’e konklui ona, no Vise-Ministru Edukasaun Joventude no Desportu (MEJD), António Guterres mak entrega ba komunidade, iha kuarta ne’e.

Notísia relevante:MEJD sosializa programa ‘Eskola ba Uma’ iha Viqueque

“Eskola ne’e hetan apoiu fundu hosi Governu Nova Zelándia ho montante $2.500. Maski fundu ki’ik, maibé komunidade konsege konstrui ho di’ak,” António Guterres, hateten ba jornalista, iha aldeia Uaikai, kuarta ne’e.

Nia apresia tebes ho komunidade iha suku ne’e tanba bele hamosu inisitiva hodi harri eskola ne’e no ikus mai hetan apoiu hosi Govenu Nova Zelándia liuhosi Unicef.

Iha fatin hanesan, Embaixadór Nova Zelándia iha Timor-Leste, Philip Hewitt, konsidera apoiu fundu ne’e kiik, maibé importante maka kontribui ba dezenvolvimentu rekursu umanu iha rai ne’e tanba edukasaun mak save importante liu.

Governu Nova Zelándia promete kontinua apoia Governu Timor-Leste, liuliu MEJD atu hadi’a di’ak liu tán kualidade edukasaun iha nasaun ne’e.

Xefe suku Afaloikai, Constantino Guterres, konta katak, durante ne’e komunidade preokupa kona-bá fatin eskola, maibé realidade hatudu, komunidade hahú hetan fatin ba eskola-oan sira.

Tanba ne’e, nia lori komunidade nia naran agradese ba Unicef ne’ebé mai implementa programa pré-eskolár komunitária.

Serimónia entrega ne’e, partisipa hosi reprezentante Unicef, autoridade postu administrativu Uatulari, no profesór no alunu-sira.

Pré-eskolár ne’e akumula estudante na’in 128 no profesór hamutuk na’in-ualu.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here