DILI, 15 setembru 2021 (TATOLI)—Governu liuhosi reuniaun Konsellu Ministru (KM), delibera atu autoriza loke prosedimentu ba aprovizionamentu relasiona ho konstrusaun edifísiu foun Institutu Politékniku Betano (IPB).
Autorizasaun ne’e ezekutivu sira fó bazeia ba projetu deliberasaun ne’ebé aprezenta hosi Ministru Ensinu Superiór, Siénsia no Kultura (MESSK), Longuinhos dos Santos.
Tuir Ministru Prezidénsia Konsellu Ministru, Fidelis Manuel Leite Magalhães, projetu konstrusaun IPB la’o tuir planu dezenvolvimentu integradu relasiona ho Planu Estratéjiku Dezenvolvimentu Nasionál ba períodu tinan 2011 to’o 2030.
Notísia relevante: MESSK prevee ona millaun $18,3 atu instala edifísiu foun IPB
“Inisiativa konstrusaun ne’e ho objetivu fundamentál atu hadi’a kualidade edukasaun ensinu superiór no aumenta kapasitasaun rekursu umanu, liuliu iha área esensiál sira ba interese nasionál,” Ministru Fidelis informa hafoin reuniaun ezekutivu, iha Palásiu Governu, kuarta ne’e.
Konstrusaun ba edifísiu foun IPB sei hahú iha tinan ne’e hanesan projetu plurianuál, iha rai ho medida ektare 10, ho totál kustu millaun $18.
Tinan ne’e, IPB hetan orsamentu millaun $1,5 atu prepara no inisia konstrusaun, enkuantu ba tinan oin hetan tetu millaun $1,1 ho proposta adisionál mil $497.
Jornalista : Antónia Gusmão
Editora : Julia Chatarina