TDD. Imajen Tatoli /Dok

DILI, 15 setembru 2021 (TATOLI)—Tribunál Distritál Dili (TDD), liuhosi primeiru interrogatóriu, aplika ona medida koasaun prizaun preventiva ba arguidu ho inisiál A ho T, ne’ebé deskonfia envolve iha grupu na’ok motór iha Dili.

Tribunál mós aplika medida koasaun aprezentasaun periódika ba arguidu ho inisiál G ne’ebé sei aprezenta an iha Polísia Sientífika Investigasaun Kriminál (PCIC, sígla portugués) semana ida dala tolu, hodi fasilita prosesu investigasaun.

Notísia relevante:TDD sei hala’o julgamentu normál iha 16 setembru

Tribunál aplika prizaun preventiva tanba iha indísiu ne’ebé forte, deskonfia na’ok motór rua no hahalok ne’e la’ós foin primeira vez akontese maibé bebeik ona.

Arguidu G mós durante ne’e hanesan tuir de’it arguidu na’in-rua, no prosesu ne’e sei iha hela segredu justisa.

Tuir kronolojia,  iha 12 setembru tuku 03:00 madrugada, arguido-sira foti ema-nia motór  ho marka mio iha Taibesi Aituri-laran no Palapasu.

Ministériu Públiku (MP) promove arguido-sira ho krime furtu agravadu  iha artigu 252  no  falsifikasaun dokumentu ne’ebé previstu iha artigu 303, hotu-hotu hosi kódigu penál.

Defensór Públiku, Albino de Jesus Pereira, ne’ebé fó asisténsia legál ba arguido-sira, hateten sei la halo rekursu hasoru desizaun tribunál nian, tanba arguido-sira konfesa faktu hotu.

Prosesu julgamentu ne’e prezide hosi singulár Argentino Luíza Nunes no MP reprezenta hosi prokuradór, Jacinto da Costa Babo.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here