Klibur Domin, Tibar. Imajen/Espesiál

DILI, 15 setembru (TATOLI)—Desde abríl to’o meiu fulan setembru, Fundasaun Klibur Domin (FKD) Tibar, hala’o atendimentu ba pasiente hamutuk na’in 29.

Pasiente hirak-ne’e, iha na’in 19 mak sofre Tuberkuloze (TBC), na’in-tolu kada semana tenke ba fase raan iha Ospitál Nasionál Guido Valadares (HNGV sígla portugés), sira seluk ne’e ema ho defisiénsia no moras mentál.

Notísia relevante:Abríl-juñu Fundasaun Klibur Domin rejista TBC 80 iha munisípiu haat

“Komunidade tauk la mai klínika ne’e tanba teste swab ba COVID-19 no foin dadaun ita iha pasiente TBC ida ne’ebé detekta mós COVID-19. Hosi ne’e pasiente-sira komesa tauk no lakohi mai, sira prefere halo tratamentu iha uma no ita-nia ekipa sira fó tratamentu iha uma.  Tanba ne’e, númeru pasiente iha Fundasaun Klibur Domin menus tebes,’’ Diretór ezekutivu FKD, Joaquim Soares, hateten ba jornalista liu hosi telephone, kuarta ne’e.

Maski nune’e, funsionáriu no voluntáriu hosi FKD Tibar ne’ebé kolokadu iha kada postu saúde, durante periúdu serka sanitária, sira mak iha responsabilidade ba prosesu tratamentu ba pasiente iha terrenu ne’ebé sofre TBC, sira buka-tuir hodi oferese ai-moruk.

Tuir dadus jerál hatudu katak, hahú hosi fulan abríl to’o juñu tinan ne’e, FKD rejista pasiente TBC, hamutuk 80 iha munisípiu Dili, Baucau, Liquiça no Viqueque.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here