Suku sira iha Munisípiu Aileu. Imajen/Espesiál

AILEU, 14 setembru 2021 (TATOLI)-Xefe Suku Liurai, Postu Administrativu Aileu-Vila, Munisípiu Aileu, Elio Dias Gomes, informa aldeia ida ho uma-kain 113 iha Fatubesi seidauk asesu ba liña eletrisidade.

Notísia Relevante : Komunidade Quirilelo kontente tebes ho prezensa MAPKOMS

“Ha’u-nia suku iha aldeia ualu (8) maibé hosi aldeia ualu ne’e aldeia hitu hetan hotu liña eletrisidade konta uma-kain balu mak seidauk, maibé iha aldeia ida ho naran Fatubesi tomak uma-kain 113 to’o agora seidauk asesu ba liña eletrisidade, ida ne’e mak difikuldade boot ida ha’u-nia komunidade hasoru durante ne’e,” Elio Dias Gomes hateten ba Agência Tatoli iha Aldeia Quirilelo, tersa ne’e.

Komunidade ne’ebé seidauk asesu liña eletrisidade nia dehan, iha tempu kalan sira ne’ebé iha kbiit sosa solár panel uza maibé sira ne’ebé laiha kbiit kontinua uza lampu tradisionál hanesan kamii.

Nia hatutan, preokupasaun sira ne’ebé komunidade durante ne’e hasoru nia nu’udar servidór proposta hato’o beibeik ona ba parte relevante maibé to’o agora seidauk iha rezultadu.

“Ita espera katak tinan oin sira ne’e ha’u-nia komunidade mós bele hetan liña eletrisidade hotu tanba programa VIII Governu nian katak antes mandatu ramata suku sira iha territóriu nasionál hotu-hotu asesu ona ba eletrisidade,” nia dehan.

Difikuldade seluk ne’ebé komunidade hasoru mak estrada hanesan ligasaun suku Liurai ba Aldeia Rairemo, Fatubesi, no Quirilelo, Laclo. Nomos problema seluk mak bee-moos tanba komunidade nia hela fatin dala ruma hela iha foho leten bee matan iha fali foho okos no durante parseiru sira hanesan Plan Internasionál mak ajuda ne’ebé sistema bee-moos iha maibé daudaun ne’e barak mak aat ona ne’ebé presiza mak halo reabilitasaun.

“Tanba preokupasaun suku nian ha’u sempre relata ba parte relevante sira iha munisípiu, ne’ebé espera bele responde preokupasaun sira ne’e,” nia dehan.

Suku Liurai iha Aldeia ualu hanesan, Aldeia Bandeira-Hun, Coulaudon, Fatulmau, Rairemo, Raimansu, Quirilelo, Fatubesi no Laclo ho totál populasaun 4,000-resin.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here