Prezidente Komisaun G PN, António Verdial. Imajen Tatoli/Antonio Gonçalves

DILI, 14 setembru 2021 (TATOLI)–Prezidente Komisaun G ne’ebé trata Edukasaun, Juventude, Kultura no Sidadania, Deputadu António Verdiál de Sousa, konsidera suspensaun aula prezensiál ho tempu ne’ebé naruk fó impaktu negativu ba estudante sira.

“MEJD foti desizaun halo suspensaun aula prezensiál ne’ebé ho tempu naruk sei fó impaktu negativu boot ba ita-nia alunu sira no ba ita-nia profesór sira,” Deputadu António Verdiál de Sousa, informa ba jornalista sira, iha uma fukun, tersa ne’e.

Vise-Xefe Bankada KHUNTO ne’e fundamenta, impaktu negativu tanba haree hosi aspetu sira hanesan alunu sira lakon interese atu estuda no iha ona ábitu kópia matéria sira.

“Estudante sira laiha ona vontade atu ba aula, laiha ona kultura atu buka lee no halo peskiza,” Deputadu Verdiál argumenta.

Nia dehan, benefísiu ba ema sira-ne’ebé mak iha fasilidade maibé defísil ba ema sira-ne’ebé laiha kbiit.

“Impaktu negativu ida mak rede internet ladi’ak, alunu sira defísil atu adapta fali ba ambiente eskolár. Defísil ba profesór sira atu adapta alunu sira atu aprende lalais no profesór sira lakon vontade atu hanorin,” nia hateten.

Nune’e mós defísil profesór sira iha aula online maibé só funsiona ba ema sira-ne’ebé iha kondisaun, maibé ba ema sira-ne’ebé laiha fasilidade ne’e susar.

“Ita hatene katak nasaun avansadu sira-ne’ebé mak afeta hotu ba pandemia COVID-19 no sira mós opta ba ensinu distánsia ka aula online ne’e, nia funisona kapaas tanba sira kria kondisaun ba alunu no profesór sira, ho nune’e laiha problema,” nia dehan.

Maibé iha Timor-Leste, nia dehan, MEJD opta ba aula online maibe to’o agora la kria kondisaun ba alunu sira no profesór sira atu utiliza no aprende.

“Karik pandemia ne’e hotu oinsá ita-nia oan sira ba kompete ho alunu sira iha nasaun seluk hanesan Indonézia, Filipina no Europa, liu-liu iha Nasaun Portugal. Ho ida-ne’e ba futuru, oinsá ita-nia oan sira atu ba kompete ka atu ba estuda iha nasaun hirak-ne’e,” Prezidente Komisaun G ne’e akresenta.

Prezidente Komisaun G ne’e husu aula prezensiál atu loke fila-fali maibé Ministeriu Edukasaun tenke kria kondisaun hanesan tau espasu ne’ebé luan entre meza no kadeira sira, tau sinalizasaun iha eskola atu alunu sira mantein distansiamentu, diminui númeru alunu sira no fahe alunu sira ho turma.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here