Sekretáriu Estadu Komunikasaun Sosiál, Merício Juvinal dos Reis ‘Akara’ no ekipa halo vizita ba Rádiu Komunidade Tatamailau Ainaro, tersa (14/09). Imajen TATOLI/Natalino Costa

AINARO, 14 setembru 2021 (TATOLI)—Sekretáriu Estadu Komunikasaun Sosiál  (SEKOMS), Merício Juvinal dos Reis ‘Akara’ no ekipa halo vizita ba Rádiu Komunidade (Rakom) Tatamailau Ainaro no iha biban ne’e, enkoraja atu kontinua maximiza funsionamentu hodi oferese informasaun di’ak ba komunidade.

Durante vizita, governante ne’e rona preokupasaun hosi jerente sira katak programasaun iha rádiu ne’e la’o ladún di’ak.

“Téknikamente sira informa mai ha’u katak programa balun maka seidauk funsiona ho di’ak, tanba ne’e ha’u orienta ona Diretór, Jestór no Prezidente Konsellu Rádiu Tatamailau atu rezolve iha tempu badak,” Sekretáriu Estadu Akara informa, iha edifísiu Rakom Tatamailau, Ainaro, tersa ne’e.

Kada tinan, iha kada fulan-neen, Governu liuhosi SEKOMS fó apoiu ba rádiu komunidade 16, ne’ebé kada faze, Rakom ida hetan $4.000 to’o $6.000.

Notísia relevante: SEKOMS selebra akordu transferénsia públiku daruak ba Rádiu Komunidade 16

Iha kontratu kooperasaun entre Governu no Rádiu Komunidade sira, programa ne’ebé sei implementa mak hanesan publisidade, talk show, divertimentu, notísia lokál, produsaun teatru ka drama no produsaun mensajen badak sira.

“Pontu importante hosi ha’u, Radiu Komunidade Tatamailau eziste nafatin maski iha frakeza balun. Daudaun ne’e implementa aproximasaun di’ak ida ba Rádiu Komunidade sira, sé maka serbisu di’ak liu, nia maka hetan osamentu boot no ida ladún produtivu, entaun nia orsamentu sai kiik. Ha’u ohin rona katak Rádiu Tatamailau nia osamentu tinan nee kiik, $3.000 de’it  tanba produtividade ladún,” nia akresenta.

Maski nune’e, SEKOMS prontu atu apoia Rádiu Komunidade sira atu funsiona ho di’ak.

Aleinde ne’e Sekretáriu Estadu rona mós prekupasaun balun hosi jestór Rádiu Tatamailau, kona-ba kestaun fasilidade serbisu, rekursu umanu no kestaun seluk tan, ho nune’e governante ne’e promote sei rezolve kestaun ida-ne’e iha tempu badak nia-laran.  

Jestora husu SEKOMS rezolve problema

Iha fatin hanesan, Jestora Rádiu Tatamailau Ainaro, Rita Barros, apresia no kontente ho presenza SEKOMS no ekipa atu haree kondisaun.

Nune’e, nia husu atu SEKOMS bele rezolve prolema balun ne’ebé Rakom ne’e enfrenta, tanba daudaun rádiu ne’e hetan problema.

“Ha’u hanoin kona-ba programasaun, ami iha ne’e kuandu iha atividade iha Ainaro, ami-nia jornalista sira halo kobertura máximu, ha’u hanoin infraestrutura laiha problema maibé rekursu umanu maka iha problema tanba ema iha Rádiu Komunidade Tatamailau rasik kuaze servisu volutáriu maka barak, enkuantu kona-ba fasilidade, ami iha motor rua ne’ebé sufisiente no komputadór rua mak avaria maibé seluk ami uza hamutuk hodi halo serbisu, ida-ne’e mak ami-nia preokupasaun. Tanba ne’e, nu’udar jestór, husu atu SEKOMS bele rezolve kestaun ne’e,” nia hatutan.

Nune’e mós, Administradór munisípiu Ainaro, Leovigildo Amaral Pereira, sente konte ho vizita SEKOMS no konsidera bele haforsa funsionamentu Rakom Ainaro.

Tanba ne’e, nia parte komprometidu atu hato’o proposta orsamentu iha tinan tuir mai hodi dezenvolve Rakom Ainaro.

“Orsamentu ba tinan 2022 ami aprezenta ona horiseik, tanba ne’e iha orsamentu tinan 2023 ba Ainaro ita aloka oitoan hodi bele dezenvolve Rádiu Komunidade Ainaro, nune’e bele fó informasaun ba komunidade sira ho di’ak,” nia dehan.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here