Prezidente Konsellu Administrasaun RTTL, E.P, José António Belo ‘Taraleu’. Imajen TATOLI/Egas Cristóvão

DILI, 14 setembru 2021 (TATOLI)–Prezidente Konsellu Administrasaun Rádiu Televizaun Timor-Leste, Empreza Públika (RTTL, E.P), José António Belo, hasoru malu ho Ministru Prezidénsia Konsellu Ministru, Fidelis Manuel Leite Magalhães, hodi hato’o informasaun no problema balun hodi buka solusaun.

“Ha’u hato’o difikuldade no problema hotu hodi buka solusaun. Ha’u atu hateten ami iha problema haat hanesan rekursu umanu, regulamentu, infraestrutura no ekipamentu,” Prezidente RTTL,E.P relata hafoin hasoru malu ho Ministru Prezidénsia Konsellu Ministru, iha Palásiu Governu, tersa ne’e.

Tuir Dirijente ne’e, problema ekipamentu tanba daudaun ne’e RTTL iha tranzisaun hosi sistema analog ba dijitál, tanba ne’e regulamentu presiza hadi’a tanba daudaun uza ne’e la kondiz ona, tanba ne’e iha hela faze diskusaun.

Kona-ba infraestrutura, atu dehan edifísiu RTTL, E.P no torre antigu ona, maibé daudaun ne’e Ministériu Asuntu Parlamentár no Komunikasaun Sosiál (MAPKOMS) apoia maka’as hodi bele iha edifísiu provizóriu ida tanba besik ona udan, tanba área Caicoli fasil tebes ba inundasaun.

Tuir planu, edifísiu RTTL, E.P sei halo iha Caicoli, hamutuk hanesan studiu no fatin servisu ba funsionáriu sira.

Aleinde ne’e, instituisaun Estadu ne’e hakarak eleva kapasidade funsionáriu sira iha área relevante.

“Kona-ba rekusu umanu, ami iha ema barak hamutuk 197, maibé ami iha problema oituan atu buka dalan haruka funsionáriu sira ba eskola hodi hasa’e sira-nia koñesementu iha nível superior no formasaun profisionál, maibé liuliu ba eskola iha universidade,” nia hatutan.

Ba kestaun eskola iha nível superior, daudaun ne’e empreza estatál esforsu hodi asina akordu ho Universidade Universidade Nasional de Timor-Leste (UNTL) atu haruka funsionáriu sira ba eskola.

Biban ne’e, Prezidente RTTL, E.P hasoru Ministru Fidelis hodi komprementa no hato’o agradesementu.

“Ha’u mai komprementa Ministru Prezidénsia Konsellu Ministru no agradese ba apoia tomak, liuliu aseita ho proposta MAPKOMS hodi nomea ha’u ba Prezidente RTTL, E.P, maski asume kargu fulan-haat ona, maibé foin mak mai hasoru,” nia dehan.

Notísia relevante: MAPKOMS garante José António Belo mellora servisu iha RTTL,E.P

Biban ne’e, parte rua ko’alia mós kona-ba koordenasaun serbisu balun no fó hanoin ba Ministru atu fó espasu ba jornalista destakadu iha Konsellu Ministru atu halo kobertura no asesu informasaun ho di’ak.

Jornalista : Antónia Gusmão

Editora      : Julia Chatarina

HAKEREK NO HATÁN

Please enter your comment!
Please enter your name here