Primeiru-Ministru, Taur Matan Ruak. Imajen TATOLI/Francisco Sony

DILI, 14 setembru 2021 (TATOLI)–Primeiru-Ministru (PM), Taur Matan Ruak, tersa ne’e, hahú hikas servisu hanesan baibain, hafoin kumpre konfinamentu obrigatóriu durante semana rua esin iha ninia rezidénsia Metiaut, tanba infetadu COVID-19.

Ho nune’e, Xefe Governu enkoraja sidadaun sira hodi partisipa másimu iha vasina kontra COVID-19, nune’e bele redús risku infetadu ho nível grave.

“Ho esperiénsia infetadu COVID-19, ha’u hakarak apela ba inan-aman no populasaun tomak, atu labele haluha vasina tanba moras ne’e realmente todan, tanba ne’e ha’u enkoraja atu hakbesik-an ba iha sentru vasinasaun atu simu vasina,” PM Taur hato’o mensajen liuhosi konferénsia imprensa, iha Rezidénsia Farol, tersa ne’e.

Notísia relevante: PM Taur infetadu COVID-19 maibé iha faze rekuperasaun

Tuir Xefe Ezekutivu, dalan atu redús pezu moras iha isin mak tenke vasina.

“Hanesan ha’u-nia esperiénsia, foin daudaun ha’u la simu vasina kompletu karik, ne’e todan oitoan tanba maski ha’u simu vasina kompletu, maibé bulelu hanesan ne’e, oinsá ho la vasina,” nia akresenta.

Notísia relevante: PM kompleta ona vasina AstraZeneca

PM konta tuir, durante sofre moras COVID-19, sente sintoma oin-oin, maski la grave, maibé ema hirak ne’ebé serbisu hamutuk PM no iha ligasaun direta mós infetadu.

“Ha’u sente bulelu, vontade han laiha, hakarak toba hela de’it, kabun moras, isin moras, isin manas oitoan, me’ar iha semana dahuluk, ne’ebé komplika oitoan ha’u-nia situasaun, maibé iha semana daruak, ha’u komesa di’ak, satán ho apoiu médiku ne’ebé kada dadeer tuku 06:00, lokraik no kalan, halo teste hodi hatene ha’u-nia evolusaun situasaun,” nia akresenta.

Durante infetadu, Xefe Ezekutivu konsome vitamina atu aumenta enerjia no suas hodi redús isin manas, ho aitahan no ai-abut, hemu bee-manas, ailia, no bani-been.

“Buat sira ne’e ajuda maka’as loos. Agora ha’u forte filafali, ha’u hasoru ona entaun ha’u-nia hakarak ajuda maun-alin sira atu labele hetan no prevene moras ne’e, tanba ne’e tenke vasina tanba laiha vasina ne’e ninia gravidade oin seluk,” nia hatutan.

Biban ne’e, PM agradese ba pesoál saúde sira ne’ebé tau atensaun maka’as ba ninia saúde.

“Liu-liu ha’u-nia médiku sira ne’ebé loron kalan la falta tau-matan mai ha’u to’o rekupera,” nia katak.

Biban ne’e, PM agradese ba Vise Primeiru-Ministra, Armanda Berta no Vise Primeiru-Ministru, José Maria dos Reis inklui membru Governu hotu, ne’ebé durante nia auzénsia, kontinua akompaña no tau-matan ba atividade governasaun, liuliu realizasaun Komité Revizaun Orsamentu Polítika (KROP) ba proposta Orsamentu Jerál Estadu (OJE) 2022.

Hafoin halo teste swab iha loron 25 agostu 2021, PM identifikadu pozitivu COVID-19, nune’e momentu ne’ebá kedan kumpre auto-izolamentu iha rezidénsia privada tuir rekomendasaun hosi saúde, nune’e  iha loron 10 setembru  halo filafali teste ho rezultadu negativu.

Jornalista : Antónia Gusmão

Editora      : Julia Chatarina

HAKEREK NO HATÁN

Please enter your comment!
Please enter your name here