Pesoal saude sira prepara ekipamentu mediku bainhira halo atendementu Vasina Astrazeneca ba komunidade sira iha Centru saude komoro, Segunda 13/9/2021.Imajen Tatoli/Antonio Goncalves

DILI, 14 setembru 2021 (TATOLI) – Ministériu Edukasaun Juventude no Desportu (MEJD) kontinua ezije ba profesór sira tenke simu vasina tanba profesór la vasina la hetan lisensa atu hanorin estudante iha aula laran.

Diretór Servisu Edukasaun Munisípiu Dili (DSEMD) Duarte Bragansa afirma katak sira simu ona orientasaun hosi MEJD  tanba antes ne’e mós iha despaixu Komisaun Funsaun Públiku nian husu bá funsionáriu hotu inklui profesór sira tenke vasina mak foin bele servisu.

Duarte hasoru ona profesores sira, sesta semana kotuk, nia fó ona atensaun ba profesores sira inklui ne’ebé mak iha kondisaun di’ak hela, maibé lakohi simu vasina sei la hetan oportunidade atu hanorin estudante sira iha aula laran.

Duarte Bragansa ba jornalista sira iha eskola ensinu sekundáriu jerál (ESJ) 12 novembru Becora, Dili, tersa ne’e, afirma  profesores ida atu hamriik iha aula laran hosi fahe matéria bá alunu sira tenke hetan uluk vasina atu garante kondisaun ida di’ak ba alunu sira no bele prevene propagasaun Covid-19 ba fali alunu sira.

Dadus professor nivel eskolaridade hosi edukasaun pre-eskolár to’o ensinu sekundáriu tékniku vokasionál ne’ebé rejista iha Dirasaun servisu Edukasaun Munisípiu Dili purvolta 3.153.  Hosi totál dadus refere kategoria profesór ne’ebé simu ona vasina hamutuk 2.565 purvolta 80,79%. Se falta de’it 700-resin mak seidauk vasina inklui profesores sira moras komplikadu, inan fó susu no inan isin-rua

Jornalista : Tomé Amado

Editór       : Francisco Simões

HAKEREK NO HATÁN

Please enter your comment!
Please enter your name here