Polísia Nasionál Timor-Leste (PNTL), muníspiu Dili, liuhosi Unidade Seksaun Tránzitu, hala’o destroisaun ka sunu kapasete hamutuk 150 ne’ebé la tuir padraun, iha sentru lixu suku Tibar, postu administrativu Bazartete, munisípiu Liquiça, tersa (14/09/21). Imajen Tatoli/Nelson de Sousa.

DILI, 14 setembru 2021 (TATOLI)—Polísia Nasionál Timor-Leste (PNTL), muníspiu Dili, liuhosi Unidade Seksaun Tránzitu, hala’o destroisaun ka sunu kapasete hamutuk 150 ne’ebé la tuir padraun, iha sentru lixu suku Tibar, postu administrativu  Bazartete, munisípiu Liquiça, tersa ne’e.

“Kapasete hirak-ne’e ita rekolla iha operasaun no halo apreensaun hosi motorista-sira, tanba la tuir padraun, nune’e ohin halo destroisaun,” Komandante Tránzitu munisípiu Dili, Inspetór Xefe, Domingos Sarmento Gama, hateten ba jornalista-sira iha Tibar, tersa ne’e.

Notisía relevante:Polísia Tránzitu Dili liberta karreta 36

Kapasete-sira ne’ebé tuir padraun maka ida ne’ebé ho marka iha lolon hakerek ho letra SNI no importante tebes hodi salva vida, tanba dala-barak dezastre fatal ka ema mate barak iha parte ulun-fatuk.

Tuir dekretu lei númeru 6/2003, 03 abríl, lei kódigu estrada iha artigu 76, kona-bá utilizasaun aséssoria seguransa-nian iha alinea 2, motorista-sira tenke utiliza kapasete tuir padraun hodi salva vida.

Polísia sei kontinua hala’o operasaun iha terrenu, bainhira motorizada sira ne’ebé utiliza kapasete la tuir padraun, sei halo apreensaun no sei koordena ho liña ministerial, hodi haree loja sira ne’ebé faan kapasete la tuir padraun.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here