Sekretária Estadu Igualdade no Inkluzaun (SEII), Maria José da Fonseca Monteiro de Jesus. Imajen Tatoli/Dok.

DILI, 14 setembru 2021 (TATOLI)—Sekretária Estadu Igualdade no Inkluzaun (SEII), Maria José da Fonseca Monteiro de Jesus, hateten liuhosi reuniaun no aprezentasaun proposta ba Komité Revizaun Orsamentu Polítika (KROP) kona-ba tetu Orsamentu Jeral Estadu (OJE) 2022, SEII propoin adisionál rihun $390.

Notísia Relevante: OJE 2021, SEII ezekuta ona 28%

“Ami husu adisionál rihun $390 ne’e atu tinan oin kontinua fali ami-nia atividade balun ne’ebé mak la konsege realiza ka implementa, hanesan rekrutamentu ba pontu fogál sira no programa seluk tán tanba osan ne’e ami ko’a tiha ba programa cesta bázika,” Maria José da Fonseca Monteiro de Jesus, hateten ba Agência TATOLI, iha salaun Katedral Vila Verde, Dili, tersa ne’e.

Hosi osan adisionál rihun $390 ne’e, nia informa, sei reforsa ba tetu orsamentu Jerál Estadu 2022 hamutuk $1,812,500.00 ne’ebé la sufisiénte ba nia programa rua ho sub-programa ualu (8) no atividade 11, progarama dahuluk mak boa-governasaun no jestaun institusionál no servisu hamutuuk ho parséria sira.

Programa daruak mak Igualdade Jéneru no Inkluzaun Sosiál ho nia sub-programa sira mak planeamentu, monitorizasaun no avaliasaun; empoderamentu ekonómiku feto no komponente vulnerável sira seluk; integrasaun kompromisu jéneru no inkluzaun sosiál iha programa sira, lei no orsamentu estadu no komunidade en jerál; hapára violénsia hasoru feto, labarik-feto no komponente vulnerável sira seluk; no partisipasaun feto iha polítika no iha nível foti-desizaun.

Orsamentu ne’ebé aloka tuir programa rua ne’ebé iha mak programa boa-governasaun no jestaun institusionál ho montante orsamentu hamutuk $775,664.00 no orsamentu ne’ebé aloka ba programa igualdade jéneru no inkluzaun sosiál ho montante orsamentu hamutuk $1,036,856.00.

Orsamentu ne’ebé aloka no sei fahe ba kategória tolu hanesan saláriu no vensimentu hamutuk $549,648.00, bens no servisu hamutuk $1,062,852.00 no transferénsia públika hamutuk $200,000.00.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here