iklan

OÉ-CUSSE (RAEOA)

Merkadu tradisionál Maumate re-ativa atividade faan no sosa

Merkadu tradisionál Maumate re-ativa atividade faan no sosa

Merkadu tradisionál Maumate hahu re-ativa atividade sosa no faan. Imajen TATOLI/Abílio Elo Nini.

OÉ-CUSSE, 14 setembru 2021 (TATOLI)—Merkadu tradisionál Maumate, suku Naimeco, sub-rejiaun Pante Makasar, tersa ne’e hahú re-ativa atividade faan no sosa (komersiál) ba komunidade sira atu faan sira-nia produtu lokál sira.

Xefe Suku Naimeco, Marcus Liu Abi, hateten desde Governu deklara aplika Serka Sanitária iha suku Naimeco no suku Bobometo durante fulan-ida semana-ida, autoridade sira mós deside hodi suspende merkadu ne’e, nune’e komunidade bele prevene-aan hosi COVID-19.

“Ohin hahú re-ativa merakdu maibé lahanesan antes ne’e. Agora komunidade mai hala’o atividade faan no sosa ne’e kuaze tuku 8:00 dadeersan mak sira mai, tanba balu sei tauk hanoin sei aplika nafatin Serka Sanitária,” Xefe suku ne’e hateten ba Agência Tatoli.

Atu asegura regulamentu Organizasaun Mundiál Saúde (OMS), antes ne’e nia informa kedas ba Komandu PNTL sub-rejiaun Pante Makasar atu fó seguransa.

Husu komunidade kumpre protokolu saúde hanesan uza máskara, fase liman bebeik, no kontinua divulga informasaun atu hakbesik-aan ba fasilidade saúde atu simu vasina.

Vendedór produtu lokál hosi sub-rejiaun Oésilo, Agustinho Quelo sente laran kmaan tanba Governu loke hikas merkadu ne’e, nune’e populasaun sira bele hala’o ona negósiu hodi buka osan atu hamatan ba nesesidade uma laran no labarik sira-nia eskola.

Merkadu tradisionál Maumate hahu re-ativa atividade sosa no faan. Imajen TATOLI/Abílio Elo Nini.

“Antes ne’e, ha’u faan bua-malus, modo-tahan no tomate hodi hetan osan. Maibé durante Serka Sanitária ne’e, ha’u araska tebes tanba merkadu taka no loro-loron iha uma de’it la-halo buat ida. Maibé, agora agradese ba Governu tanba bele loke merkadu ne’e. Ami sente kmaan ona atu faan ami-nia produtu sira-ne’e, atu sustenta ami-nia nesesidade uma laran,” nia dehan.

Entretantu vemdedór animál hosi suku Lifau, sub-rejiaun Pante Makasar, Agustinho Cusi, sujere ba Governu atu buka meiu hodi solusiona moras COVID-19 ne’e, nune’e komunidade bele livre hodi buka moris.

Antes ne’e, nia buka no sosa animál hanesan manu no bibi iha suku sira (foho), nune’e lori mai faan fali iha merkadu hodi bele hetan osan-funan maske $1 to’o $2, tanba nu’udár komunidade laiha saláriu fulan nian maibé liuhosi esforsu-aan mak bele hetan osan.

Entretantu, merkadu Maumate hala’o kada semana iha loron tersa-feira, halibur ema barak maioria mai hosi sub-rejiaun Pante Makakasar no sub-rejiaun Oésilo, inklui sub-rejiaun Nitibe no Passabe.

Jornalista : Abílio Elo Nini

Editór       : Cancio Ximenes

iklan
iklan

Leave a Reply

iklan
error: Content is protected !!