Inundasaun iha Ponte Comoro 3, domingu (04/04). Imajen TATOLI/António Gonçalves

DILI, 14 setembru 2021 (TATOLI)—Primeiru-Ministru (PM), Taur Matan Ruak, hateten, daudaun ne’e liña ministeriál halo hela esforsu atu mobiliza komunidade vítima inundasaun ba fatin seguru.

“Kona-ba vítima inundasaun sira balun ne’ebé to’o agora sei hela iha lona okos, daudaun ne’e Ministériu Administrasaun Estatál (MAE) no Sekretaria Estadu Protesaun Sivil (SEPS) halo hela esforsu maski lori tempu naruk. Ami haree hela oinsá atu ajuda sira, maibé lori tempu oitoan tanba haree alternativa atu lori sira ba fatin seguru,” PM dehan iha Rezidénsia Ofisiál, Farol, tersa ne’e.

 Tuir dadus hosi protesaun sivil, dezastre naturál ne’ebé akontese iha 04 abríl, rejista família afetadu hamutuk 30.965, ne’ebé Governu fó ona apoiu emerjénsia hamutuk 28.874 no sira ne’ebé seidauk simu hamutuk 2.09.

Notísia relevante: SEPS oferese ona materiál konstrusaun ba família 1.235

“Tanba fatin barak ne’ebé sira hela ne’e ho kondisaun risku, ita tauk sira filafali ba ne’ebá aban bainrua bele hetan fali situasaun ida piór liu. Entaun sei lori tempu oitoan, naturalmente agora ami haree hela oinsá mak hetan fatin temporária ba sira hodi aguenta hein fatin definitivu,” nia akresenta.

 Uma ne’ebé hetan estragu iha territóriu tomak hamutuk 4.472, ne’ebé Governu fó ona apoiu materiál konstrusaun ho osan mão de obra  ba família 1.235, enkuantu família 3.237 seidauk simu apoiu.

Enkuantu, ekipa task force halo identifikasaun no kalkulasaun estragu infraestrutura iha lokál 101 ho kustu millaun $245, kompostu hosi estrada hamutuk sesaun 20 resin, ponte no kontrolu cheia hamutuk 10 resin, inklui estragu sistema bee-moos kuaze 50% ho kustu kuaze millaun $7, nune’e mós estragu eletrisidade liña distribuisaun 33 no liña trasmisaun hanesan torre 16 hamutuk millaun $8,5.

“Ita hotu preokupa, maibé Governu iha ona komisaun téknika ida hodi halo levantamentu ne’ebé lidera hosi enjeñeru Benjamin, inklui tékniku sira hosi Ministériu Planu Ordenamentu, ne’ebé tuir relatóriu preleminár relata iha buat balun bele halo lais no balun presiza estudu karik hakarak garante kualidade iha tempu naruk,” PM hatutan.

Aleinde ne’e, PM mós fó ona alerta ba Konsellu Administrasaun Fundu Infraestrutura (KAFI) atu jere fundu didi’ak ba projetu ne’ebé presiza halo, balun planeadu, balun kleur ona no tenke kontinua.

“Ha’u kontinua alerta ba ekipa téniku sira tau atensaun, tanba preokupasaun ne’ebé boot liu maka ho klima ida agora, ne’ebé risku piór liután bainhira la halo intervensaun lalais. Ha’u orienta ona ekipa téknika sira hodi rezolve infraestrutura públika ne’ebé hetan estragu impaktu hosi dezastre naturál ne’ebé akontese foin lalais,” Xefe Ezekutivu subliña.

Notísia relevante: Vítima inundasaun Manleuana husu Governu apoiu materiál konstrusaun

Dadus  hosi  SEPS  dadaun iha  família uma-kain 131 ho membru  família 701 mak kontinua hela iha sentru  akollamentu neen hanesan Don Bosco Comoro akumula família 35, kapela Hera família 25, Igreja Parókria Hera familía 14, sede suku Manleuana 41, eis restaurante Metiaut iha sia, sentru akollamentu rate ain Canossa kotuk iha família hitu.

Tuir identifikasaun SEPS nian, família hela iha lona okos, maka hanesan  sentru evakuasaun rate ain eskola  Canossa   nia kotuk, sede suku Manleuana, ho Akanunu Hera no sira seluk hela uma provizóriu ne’ebé konstrui hosi komunidade Salezianu no vítima seluk sei nafatin iha sede suku Manleuana.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here