Membru PNTL lori arguidu ZN (60), ba Tribunál Distritál Dili (TDD), hodi submete ba julgamentu primeiru interrogatóriu, tanba deskonfia komete kazu insestu, tersa (14/09/21). Imajen Tatoli/Nelson de Sousa.

DILI, 14 setembru 2021 (TATOLI)—Tribunál Distritál Dili (TDD), liuhosi julgamentu primeiru interrogatóriu, aplika ona medida koasaun aprezentasaun periódika ba arguidu ho inisiál ZN (60), ne’ebé deskonfia komete kazu insestu.

Faktu ba kazu ne’e, deskonfia ba arguidu halo krime abuzu seksuál ho insestu ba nia oan feto rasik  ho insiál V (20), iha 08 agostu no 15 setembru tinan ne’e, iha rezidénsia Fatuhada, Dili, nune’e parte família hato’o keixa ba polísia.

Notísia relevante:TDD sei hala’o julgamentu normál iha 16 setembru 

Ministériu Públiku (MP), promove arguidu ho krime koasaun seksuál previstu iha artigu 171 kódigu penál, ne’ebé hateten se mak obriga ema seluk sofre ka prátika, ho nia ka ho ema seluk, aktu seksuál relevante, ho violénsia, ameasa grave, ka ba fim ida-ne’e, halo uluk tiha ema-ne’e lakon konxiénsia ka labele reziste, sei hetan pena prizaun tinan rua  to’o ualu, nune’e iha alegasaun, MP husu atu aplika prizaun preventiva ba arguidu.

Durante primeiru interrogatóriu, arguidu konfesa nia parte nunka halo atitude refere, maibé arguidu hirus oan feto tanba la halo kafé nune’e (oan-red) halai ba tiun sira.

Arguidu mós konfesa katak, agora daudaun tiun ne’ebé nia-oan feto halai ho arguido, hirus-malu hela kona-bá problema rai no uma.

Defensór Públiku, Marçal Mascarenhas, ne’ebé fó asisténsia ba arguidu, hateten, haree ba indísiu ladún forte, nune’e Tribunál aplika de’it Termu Indentidade Rezidénsia (TIR) ho medida koasaun aprezentasaun periódika.

“Arguidu sei aprezenta an semana ida dala ida, iha postu polísia ne’ebé besik, hodi submete ba investigasaun hosi MP, bele rekolla prova liu-tán, hodi aprezenta iha Tribunál iha julgamentu normál tuir-mai,’’ Marçal Mascarenhas, hateten iha TDD, Mandarin, tersa ne’e.

Tanba ne’e, prosesu refere sei iha segredu justisa no seida’uk hatene arguidu sala ka loos, hodi hein julgamentu normál tuir-mai.

Prosesu primeiru interrogatóriu ne’e, prezide hosi juiz turnu Argentinho Nunes no MP reprezenta hosi prokuradór, Nelson Carvalho.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here