Prezidente Aautoridade Munisípiu Dili, Guilhermina F.S. Ribeiro. Imajen Tatoli/dok

DILI, 14 setembru 2021 (TATOLI)—Vise Ministru Administrasaun Estatál (MAE), Lino de Jesus Torrezão, informa Governu liuhosi MAE sei fó pose ba Prezidente Autoridade Munisipiu (PAM) Dili iha 20 setembru 2021, nune’e bele hala’o ona nia knaar nu’udar prezidente autoridade munisipál.

Notísia Relevante: COVID-19, MAE suspende serimónia fó posse ba PAM Dili

“Data fiksu ne’ebé ami atu fó pose ba PAM Dili foun, Guilhermina Filomeno Saldanha Ribeiro, iha 20 setembru 2021, atu nune’e nia bele halo ona servisu hanesan PAM tanba kleur demais ona,” Lino de Jesus Torrezão hateten ba Agência TATOLI, iha nia knaar fatin, Colmera, Dili, tersa ne’e.

Maske Timor-Leste enfrenta pandemia COVID-19 maibé ho desizaun hosi Konselllu Ministru hakotu konfinamentu domisiliáriu iha Munisípiu Dili, mak Governu deside tenke fó ona pose ba PAM Dili foun iha segunda (20/09) oin mai.

“Atu fó pose ida-ne’e, hein kleur loos tiha ona tanba de’it moras COVID-19 ne’ebe mundu tomak enfrenta inklui ita Timor-Leste. Maibé iha loron hirak liubá, ita-nia Governu deside hodi hakotu konfinamentu obrigatóriu, entaun ita tenke aselera nune’e konklui tiha pose ba PAM Dili foun ne’e,” Lino Torrezão hateten.

Governante ne’e hateten, tuir loloos iha 03 setembru ne’e Governu fó ona pose ba PAM Dili foun maibé tanba konfinamentu obrigatóriu entaun MAE deside hodi adia no iha tersa (14/09) ne’e MAE deside ona loron 20 setembru sei fó pose.

“Ha’u garante 20 setembru ne’e sei fó pose ba PAM Dili foun tanba númeru kazu foun COVID-19 hahú menus ona,” nia dehan.

Prezidente Interinu Autoridade Munisípiu Dili, António Moniz Clau, mós informa katak iha loron 20 setembru ne’e, Prezidente foun Autoridade Munisípiu Dili, Guilhermina Filomena Saldanha,  simu pose.

Nia informa, termu pose ne’e loloos ne’e halo iha fulan kotuk, maibé tanba ho situasaun COVID-19 ne’ebé Munisípiu Dili aplika konfinamentu obrigatóriu la fó espasu atu bele halibur malu, maibé agora livre ona Governu liuhosi Ministériu Administrasaun Estatál fó ona orientasaun katak Prezidente Autoridade foun sei simu pose fulan ne’e.

“Ko’alia kona-ba ba pose ba ita-nia Prezidente foun Autoridade Munisípiu Dili, tuir orientasaun hosi Ministru Administrasaun Estatál (MAE) 20 setembru agora fó ona pose ba ita-nia foun munisípiu Dili Guilhermina Filomena Saldanha,” António Moniz Clau hateten, kinta ne’e.

Serimónia pose sei prezide  diretamente hosi Ministru Administrasaun Estatál, Miguel Perreira de Carvalho no fatin ba serimónia hala’o iha Administrasaun Munisípiu Dili.

Jornalista : Osória Marques/Arminda Fonseca

Editor      : Cancio Ximenes

 

HAKEREK NO HATÁN

Please enter your comment!
Please enter your name here