Koordenadór GASC, Filipe da Costa, entrega akordu subvensaun públika ba organizasaun, iha Palásiu Governu, tersa (14/09). Imajen TATOLI/Egas Cristóvão

DILI, 14 setembru 2021 (TATOLI)–Gabinete Apoiu Sosiedade Sivil (GASC, sigla portugés) selebra akordu ho grupu komunitáriu no rezisténsia hamutuk 79 hodi realiza transferénsia fundu, ne’ebé antes ne’e realiza ona ho tipu hanesan.

“Asina akordu ba etapa datoluk, ida-ne’e grupu datoluk ne’ebé mak asina akordu no grupu ne’e nia laran iha organizasaun baze komunitária 51 inklui organizasaun rezisténsia sira ne’ebé benefisia ba fundu apoiu sosiedade sivil iha 28,” Koordenadór GASC, Filipe da Costa, relata, hafoin selebra akordu iha auditóriu GASC, Palásiu Governu, tersa ne’e.

Hafoin asina akordu ne’e, GASC sei ezekuta fundu hamutuk millaun $2 resin, nune’e ezekusaun Orsamentu Jerál Estadu (OJE) 2021 ba instituisaun ne’e sa’e ba 86%.

“Ami kontente katak hosi apoia ne’e iha atividade oioin de’it, ne’ebé barak mós envolve iha atividade dada bee-moos ba komunidade ho projetu eskalaun kiik, hanesan kilómetru rua to’o tolu, ne’ebé baibain la tama iha projetu boot sira, entaun organizasaun sosiedade sivil voluntáriamente hatama pedidu sosa materiál no halo kanalizasaun sistema ne’ebé ho eskalaun kiik. Nune’e mós fó formasaun ba grupu agrikultór no ortikultura,” nia esplika.

Nune’e, Koordenadór ne’e espera, ho apoiu fundu ne’e bele atribui apoia ba komunidade no tulun Governu hodi atinje objetivu, katak atubele asegura aihan ne’ebé seguru no nutrisaun ba populasaun sira, inklui tulun komunidade hetan rendimentu família no organizasaun sira ne’ebé ligadu ho advokasia, monitorizasaun ba sistema servisu públiku atu nune’e asegura boa governasaun, garante direitu umanu, no demokrasia di’ak liután iha futuru.

“GASC garante katak tanba proposta hotu aprova ona, entaun ne’e hatudu katak ami sei iha posibilidade atu gasta fundu apoiu sosiedade sivil ne’e to’o 98% tanba osan sira ne’e hein de’it ona sosiedade sivil sira ba implementa atividade no hatama relatóriu, nune’e hatudu katak ezekusaun ami-nian di’ak,” nia subliña.

Nune’e, Koordenadór ne’e garante ezekusaun orsamentu GASC ne’e tinan-tinan di’ak tanba ezekuta orsamentu bazeia ba proposta hosi sosiedade sivil sira.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here