Diretór Ezekutivu Sentru Formasaun Fundasaun Hadomi Timor, Abrão Monteiro. Imajen/Esesiál.

DILI, 14 setembru 2021 (TATOLI)—Diretór Ezekutivu, Sentru Formasaun Fundasaun Hadomi Timor (SFFHT), Abrão Monteiro informa, iha sabádu (18/09) ne’e SFFHT sei realiza formasaun kona-bá “Instalasaun Windows 7 no 10” ba partisipante 25 kompostu hosi estudante universitáriu, joven sira no funsionáriu sira.

Notísia Relevante: Fundasaun Hadomi Timor realiza formasaun “video editing” ba joven sira

“Formasaun ne’e atu ajuda itania joven sira ne’ebé sira-ne’ebé sira-nia backround la’ós IT maibé sidadaun ka joven jeralmente hodi bele komprende prosesu instalasaun báziku ba itania komputadór ne’e hanesan ne’ebé,” Abrão Monteiro hateten ba Agência Tatoli, iha nia kna’arfatin, Faról, Dili, tersa ne’e.

Formasaun ida-ne’e ho objetivu atu fasilita joven sira, estudante no funsionáriu hodi rezolve ninia problema ba komputadór rasik, bainhira nia bele resolve ne’e bele rezolve ho ninia abilidade rasik.

Matéria formasaun ne’e sei halo pakote tolu mak instrodusaun jerál ba teknólojia, ezistênsia téknolojia agora dadaun ne’e adota teknólojia no prosesu ba instalasaun.

“Iha prosesu instalasaun ne’e, ami sei halo ba buat tolu. Ida ba sistema operativu ne’e rasik ba windows 7 no 10, tanba agora daudaun maioria utiliza ida-ne’e. Windows 11 hahú iha ona maibé iha ema barak mak seidauk utiliza. Daruak instalasaun ba iha driver, hodi suporta ba itania sistema operativu, hodi bele halo di’ak no ikus liu atu garante nia operasaun ba oin tanba ita mós instala aplikasaun,” nia informa.

Reativa formasaun

Entretantu Fundasaun Hadomi Timor reativa ona atividade formasaun iha segunta (13/09) tanba Konsellu Ministru hakotu ona konfinamentu obrigatóriu jerál iha Dili.

Sentru ne’e garante bele reativa atividade formasaun tanba formandu sira 75% mak kompleta ona vasina ba segundu doze nian no hosi 75% ne’e maioria universitáriu no estudante Ensinu Sekundáriu tanba sira hetan orientasaun hosi eskola tenke simu vasina, no formandu falta 25% mak hein hela hodi halo kompleta ba vasina segundu doze nian.

Sentru ne’e uluk iha realiza formasaun iha área konstrusaun sivíl, arkitektura, administrasaun, estátistika maibé hahú iha 2008 kedas sentru ne’e foku ba área área IT nian ho língua.

“Iha área língua hanesan inglés no korea nian ne’e selu hanesan. Kada fulan estudante tenke selu $25. Osan sira-ne’e mak uuza hodi seluu formadór no uza ba nesesidade seluk. Formandu sira mai halo rejistrasaun $5, kada fulan sira selu $25. Durasaun kursu fulan tolu ho nia totál sorumutu dala 36,” nia informa.

Iha área no programa IT nian mak programa espesifiku no programa IT Smart ne’ebé ho durasaun fulan hitu ne’e, formandu sira kursu fulan lima regularmente loroloron to’o fulan lima, depois fulan rua mak sira halo estájiu no fulan lima nian ne’e sira selu kada fulan selu $25.

Ezemplu, formasaun ba programa espesifiku hanesan ba Microsoft Office hasoru malu dala 24 to’o 30 ne’e selu $75 no Teknik komputadór hasoru malu dala-12 to’o 16 ne’e selu $60.

Networking Báziku hasoru malu dala 12 to’o 16 ne’e selu $60 no Mikrotik Server hasoru malu dala 12 to’o 16 ne’e selu $75. Web design hasoru malu dala-12  to’o 16 ne’e selu $60 no Web programming hasoru malu dala-12 to’o 16 ne’e selu $75.

Linux Báziku hasoru malu dala 12 to’o 16 ne’e selu $75, Cisco Level I, II, no III hasoru malu dala-12 to’o 16 ne’e selu $75 no Java OOP hasoru malu dala-12 to’o 16 ne’e selu $75. Totál formandu ba tinan ne’e hamutuk 100resin ba área formasaun IT Smart, língua, no programa espesifiku sira.

Jornalista  : Nelia Fernandes  

Editór       : Cancio Ximenes

HAKEREK NO HATÁN

Please enter your comment!
Please enter your name here