Pontu Fokál ba Mitsubishi Asian Children’s Enikki Festa Timor-Leste, Júlio Gusmão Amaral. Imajen Tatoli/Nelia Fernandes.

DILI, 14 setembru 2021 (TATOLI)—Pontu Fokál ba Mitsubishi Asian Children’s Enikki Festa Timor-Leste, Júlio Gusmão Amaral, informa estudante na’in-ualu (8) hosi ensinu bázika iha Timor-Leste mak sai vensedór nasionál ba kompetisaun “Mitsubishi Asian Children’s Enikki Festa” etapa 2021 no 2022.

Nia hateten, komisaun organizadora realiza ona kompetisaun dezeñu ba labarik sira iha kompteisaun Mitsubishi Asian Children’s Enikki Festa etapa 2021-2022 iha Timor-Leste no halo ona selesaun nasionál ba labarik sira-nia dezeñu.

Notísia Relevante: SEAK finaliza kompetisaun “Mitsubishi Asian Children’s Enikki Festa” ba labarik sira

“Iha selesaun nasionál ne’e, iha labarik na’in-ualu (8) mak sai nu’udar vensedór nasionál,” Júlio Gusmão Amaral hateten ba Agência Tatoli, iha nia kna’ar-fatin, Avenida Portugal, Díli, ohin.

Labarik na’in-ualu ne’e nu’udar manan na’in hodi reprezenta Timor-Leste no sira-nia obra ne’e, Sekretáriadu Estadu Arte no Kultura (EAK) sei manda ba iha Japaun hodi halo tán selesaun internasionál iha Japaun.

“Orsida to’o iha Japaun, ema sei hili sira na’in-ida tan nu’udar manan na’in ba Grande Premiu. Entre na’in-ualu ne’e, orsida ekipa juri internasionál iha Japaun mak sei hili ida-ne’e no hosi Timor sei hili ema ida nu’udar manan-na’in ba Grande Premiu iha Japaun. Nune’e, bainhira sira-nia obra to’o iha ne’ebá, juri mak deside ona. Maibé provavélmente tuir kalendáriu ne’ebé iha, sira sei festeza iha fulan-abril 2022 nia laran no iha fulan jullu 2021, sira bele fó sai ona rezultadu,” nia informa.

Iha prosesu avaliasaun ne’e, ekipa juri halo selesaun bazea ba kritériu hosi Japaun fó mai hanesan haree ba labarik sira-nia kapasidade no kreatividade ne’ebé mak sira espresa iha dezeñu, haree mós ba labarik sira-nia redasaun (ideia) ne’ebé mak sira tau no labarik nia dezeñu ne’e kobre tópiku barak.

“Ezemplu, moris loro-loron hanesan ba eskola no nia mós kobre tan kultura Timor nian mak relasiona ho ninia munisípiu nian. Entaun, labarik ne’e iha oportunidade hodi sai vensedór nasionál,” nia dehan.

Hosi rezultadu ba vensedór nasionál na’in-ualu ne’e, sira-nia obra ne’e espresa sira-nia moris loro-loron nian iha sira-nia dezeñu no redasaun (ideia) hanesan dezeñu sira-nia eskola no atividade loro-loron hanesan ajuda inan-aman ba haree karau, halo natar no balun dezeñu karik sai eskola, ajuda nia apá hadi’a kareta, no balun mós konta sira-nia identidade lokál nian kona-bá kultura Timor nian.

Tuir planu, iha semana oin SEAK sei lori obra hosi vensedór na’in-ualu nia kreatividade ba Japaun, hodi halo selesaun ba manan-na’in ida sai Grande Premiu.

“Ami-nia planu atu lori vensedór na’in-ualu nia kreatividade ba Japaun iha semana oin tanba daudaun ne’e buat hotu kompletu ona no orsida sei halo embalajen tau iha envolope ida, hodi lori ba iha DHL (Dalsey, Hillblom and Lynn), no sira mak sei manda ba Japaun,” nia haktuir.

Entretantu, estudante na’in-ualu (8) ne’ebé sai vensedór nasionál mak hanesan Luís Escurial Soares (idade 11) eskola iha CAFE Manatuto ho klase 50 ano, Baquita Rosena Rodriguês (12) eskola iha CAFE Manatuto ho klase 60 ano, Jesuinha Christy Gomes do Rego (11) eskola iha CAFE Manatuto ho klase 50 ano, Joaneta Curia Sarmento (11) eskola iha CAFE Manatuto ho klase 50 ano.

Joshua Elyom Renesma Neves (idade 11) eskola iha Eskola Bázika Filiál Uma-Forma ho klase 50 ano, Artemízia Soares de Araújo da Conceição (11) eskola iha CAFE Ainaro ho klase 50 ano, Marilha Mima Amado (11) eskola iha CAFE Ainaro ho klase 50 ano, Celeneia Barreto Ribeiro (11) eskola iha Eskola Bázika Central Katólika Santo Arnaldo Janssen ho klase 50 ano.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here