Estudante Eskola Sekundária Tékniku Vokasionál Teknolojia no Industriál Becora. Imajen TATOLI/Egas Cristóvão

DILI, 14 setembru 2021 (TATOLI) – Dirasaun Servisu Edukasaun Munisípiu Dili (DSEMD) hahú ona halo monitorizasaun ba preparasaun eskola sira nian molok governu deside reativa  ensinu aprendizajen aula prejensiál.

Diretór  Servisu Edukasaun Munisípiu Dili (DSEMD), Duarte Bragansa, informa nia parte halo monitorizasaun ba eskola rua mak hanesan eskola ensinu sekundáriu jerál 12 novembru Becora ho eskola ensinu sekundáriu jerál 5 de maiu Becora.

Observasaun ka monitorizasaun ne’e atu haree atividade saida maka eskola sira prepara hodi bele responde nesesidade alunu sira nian bainhira Governu deside re-ativa aula prejensiál.

“Ha’u hakarak haree besik liu atividade saida maka eskola sira halo atu responde bá nesesidade alunu sira nian.  Ha’u haree eskola ensinu sekundáriu Jerál 12 novembru Becora hatudu responsabilidade servisu hamutuk hodi halo preparasaun ida di’ak tebes,”Duarte Bragansa haktuir ba jornalista sira, tersa ne’e.

Nia esplika katak observasaun no monitorizasaun Edukasaun Munisípiu Dili nian haree besik liu preparasaun rezumu matéria atu distribui ba alunu  sira iha ka lae, profesór sira simu ona vasina ka lae no eskola sira kria grupu online ka lae. Maibé realidade iha duni tanba lista prezensa eskola halo ba alunu sira iha duni faktu.

Diretór Eskola ESJ 12 novembru Becora, Aniceto Pedro da Costa afirma katak durante ne’e sira implementa atividade eskola nian bazeia bá orientasaun Ministériu Edukasaun liuhosi dirasaun edukasaun munisípiu.

Aniceto hatete, rezumu matéria no eskola online iha 12 novembru durante ne’e lao hela tanba eskola kria grupu WhatsApp ne’e atu fasilita ema hotu tantu profesores no alunu bele iha kontaktu hodi divulga informasaun kona-bá matéria-sira.

 “Ami orgullu bele hasoru malu ho Diretór Edukasaun Munisípiu Dili atu bele fanu nafatin ami edukadór sira atu laran badinas hodi prepara kondisaun bá alunu sira maske hela iha uma”.

Jornalista : Tomé Amado

Editór       : Francisco Simões

HAKEREK NO HATÁN

Please enter your comment!
Please enter your name here