Universidade Nasionál Timor Lorosa’e (UNTL), ohin hala’o serimonia graduasaun ba estudante sira iha Sentru Konvensaun Dili. Imajen Tatoli/ António Goncalves

DILI, 13 setembru 2021 (TATOLI) – Universidade Nasionál Timor-Lorosa’e (UNTL) hein hela despaixu Ministériu Ensinu Superiór Siénsia no Kultura (MESSK) nian atu kontinua realiza graduasaun ba estudante-sira.

Vise-Reitór Asuntu Akadémiku no Garantia Kualidade, Samuel Venâncio de Sousa Freitas, informa universidade preparadu hela atu alkansa programa graduasaun ba estudante sira. tanba ne’e, hein hela despaixu Governu nian.

Ba Agência Tatoli, segunda ne’e, iha nia servisu fatin, Samuel akresenta katak númeru graduadu atu simu graduasaun ne’e to’o agora laiha mudansa. Signifika dadus mantein nafatin hein de’it desizaun formál Governu nian atu re-ativa eskola sira.

Ministru Ensinu Superiór Siénsia no Kultura (MESSK), Longuinhos dos Santos, deklara katak nia haruka ona karta bá Ministériu Saúde husu rekomendasaun atu re-ativa atividade letiva iha instituisaun ensinu superiór tantu públiku no privada sira

“Ha’u hein hela rekomendasaun MS nian atu re-ativa atividade letiva iha IES privadu no públiku sira,” nia hateten.

Ministra Saúde (MS) Odete Maria Freitas Belo depois remata enkontru Komisaun Revizaun Orsamentu Polítika (KROP) iha Ministériu Finansas, sesta (09/09), informa katak nia seidauk foti desizaun ruma kona ba asuntu eskola nian tanba seidauk simu karta hosi parte edukasaun.

“Ha’u seidauk simu karta hosi parte edukasaun no ensinu superiór nian kuandu ha’u simu ona maka ha’u bele fó resposta bá asuntu ne’e,” Odete Freitas Belo hateten.

Jornalista : Tomé Amado

Editór        : Francisco Simões

  

HAKEREK NO HATÁN

Please enter your comment!
Please enter your name here