Sekretáriu Jerál no Atuál Deputadu (UDT), Francisco David Xavier Carlos. Imajen/Egas Cristóvão.

DILI, 13 setembru 2021 (TATOLI)—Partidu União Democrática Timorense (UDT) prepara ona orsamentu no forma ona ekipa hodi halo preparasaun realiza kongresu nasionál ba dala-neen (VI) ne’e.

“Ami prepara ona orsamentu kuaze rihun $40 atu realiza kongresu ne’e. Orsamentu ne’e mós atu aloka ba munisípiu 13 sira tanba reprezentante kada munisípiu hamutuk ema na’in-25 nomós sira-nia estádia iha Dili durante loron rua,” Sekretáriu Jerál UDT, Francisco David Xavier Carlos, informa ba jornalista sira, iha uma fukun, segunda ne’e.

Preparasaun ba kongresu ne’e planea kleur ona maibé ho konfimanentu obrigatóriu no serka sanitária mak impede prosesu ne’e, maibé intensaun hosi Kongresu Nasionál ne’e atu re-estrurura dirasaun UDT nian rasik, nune’e hasoru eleisaun parlamentár 2023 no UDT sei forte liu iha futuru.

Sekretáriu Jerál UDT ne’e espera situasaun bele fila ba normalidade, nune’e bele konkretiza kongresu ne’e tanba data fiksu atu realiza kongresu ne’e seidauk deside maibé preparasaun la’o daudaun ona.

Entretantu, estrutura atuál forma ona ekipa iha loron 18 fulan-fevereiru 2021, iha sede UDT, Palapasso, Dili, no iha opurtunidade ne’e, Nicson Madeira Lay mak sai nu’udar Prezidente Komisaun Organizadora ba kongresu ba dala-neen ne’e.

Sekretáriu Jerál UDT Francisco David Xavier Carlos hateten, kongresu ne’e rasik sei uza osan hosi subvensaun públika ne’ebé atribui hosi Komisaun Nasionál Eleisaun (CNE-sigla portugés),.

Subvensaun públika ne’ebé CNE fó ba UDT ne’e hamutuk rihun $92 bazea ba asentu parlamentár no osan ne’e mós durante ne’e utiliza reforsa estrutura partidu nian iha baze no kontaktu eleitorál.

“Ami jere ho kuidadu nune’e labele dependénsia ba sé de’it atu fó osan ba ami. Ami iha ajenda barak maibé ami sei halo lai kongresu depois estrutura foun mak implementa programa sira-ne’e. Neste momentu tanba kestaun distansiamentu sosiál, ami labele halo buat ida. Maibé ekipa komisaun ba kongresu ami forma ona,” nia informa.

União Democrática Timorense (UDT) nu’udar partidu polítiku dahuluk ne’ebé funda iha loron 11 maiu 1974. UDT funda hosi Francisco Lopes da CruzManuel CarrascalãoMário CarrascalãoJoão Carrascalão no Domingos Oliveira.

UDT derrota hosi FRETILIN liuhosi guerra sivíl 1975 no dirijente sira maioria asasinadu ka exíliu. Iha loron 27 juñu 1976, aviaun Cruz Vermelha Portugueza ida lori soldadu portugés na’in-23 no na’in-129 refujiadu timor-oan hosi Atambua ba Portugál.

Liutiha tinan balun, UDT hasoru difikuldade organizativa no hasoru mós reorganizasaun boot liu iha Kongresu Extraordináriu iha Lisboa, iha fulan-dezembru 1993.

Hafoin Timor-Leste independénsia, João Guterres Viegas Carrascalão lidera UDT no Prezidente UDT ne’e mate troka hosi Gilman Exposto hodi lidera UDT.

Purtantu iha loron 25 novembru, Prezidente UDT Gilman Exposto dos Santos Exposto hakotu iis iha Hospital Nacional Guido Valadares (HNGV) tanba hetan atakasaun korasaun (kardiovaskulár).

Nune’e estrutura deside hodi hili Rudolfo Aparício Guterres nu’udar Prezidente UDT Ein-Ezersísiu hodi hein rezultadu hosi kongresu nasionál ne’e.

Entretantu estrutura atuál kompostu hosi Prezidente UD Ein-Ezersísiu Rudolfo Aparício Guterres, Sekretáriu Jerál Francisco David Xavier Carlos, Primeiru Vise-Sekretáriu Jerál Clementino Gonçalves da Costa, Segundu Vise-Sekretária Jerál Deonaia da Silva no Terçeira Vise-Sekretária Jerál Cidália dos Santos. Estrutura tuan ne’e hili liuhosi kongresu dalima nian iha tinan hirak liubá.

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here