Komandante Polísia Nasionál Timor-Leste munisípiu Baucau, Superintendente Xefe Armando Monteiro. Imajen TATOLI/Natalino Belo

BAUCAU, 13 setembru 2021 (TATOLI)–Komandante Polísia Nasionál Timor-Leste (PNTL) Baucau, Superintendente Armando Monteiro, hateten, sidadaun hamutuk na’in-198 ne’ebé deporta hosi Indonézia hala’o ona prosesa identifikasaun iha fatin izolamentu Gináziu Baucau.

“Hahú horiseik tuku 17:00 to’o 23:00 kalan, Servisu Sientífika Investigasaun Kriminál (PCIC, sigla portugés) no Imigrasaun halo identifikasaun dahuluk no tuir planu bain-rua termina tanba prazu iha kuarentena ohin hamutuk loron 23 ona no hosi sidadaun 198 ne’e, hela de’it ida mak sei pozitivu,” Superintendente Armando Monteiro, hateten, iha ninia knar fatin Villa nova Baucau segunda ohin.

Notísia relevante: Timor-oan 198 ultrapasa liña fronteira Indonézia tama ona izolamentu Baucau

Sidadaun hirak ne’e kompostu hosi feto lima no restu mane hotu, mai hosi Ermera hamutuk 78, Dili 28, Suai 21, Baucau rua, Viqueque lima no restu hosi munisípiu seluk.

Autoridade Polísia Indonézia kaptura sidadaun hirak ne’e, hafoin entrega ba autoridade Timor-Leste.

Nune’e, iha sábadu (21/08) maizumenus tuku 19:00 Otl, Komandu PNTL Baucau simu orientasaun hosi Komandu Jerál atu kria kondisaun liuhosi servisu konjunta Sentru Intergradu Jestaun Krize (CIGC, sigla portugés) Baucau, atu simu sidadaun ne’ebé utrapasa liña fronteira ho dalan ilegál.

Hafoin tuku 22:00 resin kalan loron hanesan, sidadaun deportadu to’o iha Baucau no ofisialmente simu liuhosi CIGC no daudaun utiliza Ginájiu Baucau (GOR, sigla indonéziu) sai hanesan sentru izolamentu provizóriu.

Superintendente Armando Monteiro esplika, liuhosi teste swab faze dahuluk, iha sidadaun na’in-64 mak pozitivu no halo izolamentu ketak, iha faze daruak analiza laboratóriu deteta tan na’in-41 pozitivu  mak pozitivu tan no ikus deteta na’in-ida mak pozitivu.

Bainhira ramata prosesu investigasaun, PNTL Baucau sei halo relatóriu finál ba CIGC nasionál hodi hetan orientasaun atu reintrega fali ba família.

“Prosesu identifikasaun hotu ita mos sei aprezenta ba Ministériu Públiku (MP) hanesan na’in ba asaun penál, maibe ita hein orientasaun saida mak hato’o ita la’o tuir,” Armando akresenta.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here