Prezidente Repúblika,Francisco Guterres Lú Olo. Imajen Tatoli/António Gonçalves.

DILI, 13 setembru 2021 (TATOLI)—Prezidente Repúblika, Francisco Guterres Lú Olo, promulga alterasaun dahuluk ba Dekretu-Lei kona-ba Estatutu Instituto para a Qualidade de Timor-Leste, I.P. (IQTL).

Nota imprensa ne’ebé Agência Tatoli asesu ne’e haktuir, alterasaun dahuluk ba Dekretu-Lei nee hala’o ba kompozisaun orgaun sira no rekizitu sira-neebé kesi IQTL, aumenta númeru membru sira no konkretiza kompeténsia sira-ne’ebé pertense ba orgaun sira IQTL ninian.

Nune’e m’os, hala’o armonizasaun ekiparasaun ba kategoria siratitulár kargu sira iha orgaun sira IQTL nian no kláuzula Estatutu IQTL ne’ebé sai parte integrante h0si Dekretu-Lei neebé kria institutu ne’e mós sai sujeitu ba alterasaun.

Entre artigu sira-neebé hetan alterasaun mak artigu 3 ne’ebé dehan katak IQTL bele hala’o servisu territorialmente deskonsentradu. Ministru Turismu, Komérsiu no Indústria mak sei tutela no iha kompeténsia nomea no ezonera Konsellu Administrasaun no Konsellu Fiskal IQTL, I.P (iha kazu nomeasaun no ezonerasaun Konsellu Fiskal, Ministru Finansas mak tenke propoin).

Konsellu Administrasaun sei kompostu hosi prezidente ida, sekretáriu ida no vogais na’in-tolu (3), nomeadu hosi Ministru ne’ebé tutela. Molok ida-nee, Konsellu Administrasaun kompostu hosi prezidente no vogais nain-rua (2), nomeadu hosi Konsellu Ministrus,bazeadu ba proposta hosi Ministru tutela.

Konsellu Fiskal sei kompostu hosi membru na’in-tolu (3), nomeadu hosi Ministru tutela, bazeadu ba proposta hosi Ministru Finansa. Molok ida-nee, Konsellu Fiskal kompostu hosi membru nain-rua, nomeadu hosi Konsellu Ministru (ida indikadu hosi Ministru Finansa no ida seluk hosi Ministru Turizmu, Komérsiu no Indústria ne’ebé tutela ba institutu públiku ne’e).

Iha ámbitu kompeténsia ninian, Konsellu Administrasaun mai ho kompeténsias foun mak hanesan propoin ba Ministru tutela aprovasaun mapa pesoal, elabora paresér, informasaun ne’ebé mak Ministru tutela solisita no ezerse poder disiplinár (artigu 9).

Prezidente Konsellu Administrasaun iha kompeténsia foun, inklui define ordem traballu no reuniaun Konsellu Administrasaun nian no hato’o paresér ba Konsellu Fiskal (artigu 13).  Kompeténsia foun ba Konsellu Fiskal mak fó paresér kona-ba akizisaun, arrendamentu, alienasaun no onerasaun bens imóveis, fó nafatin informasaun ba Konsellu Administrasaun kona-ba rezultadu verifikasaun no ezames neebé mak halao no propoin ba Ministru tutela no ba Konsellu Administrasaun kona-ba promosaun auditoria esterna.

Instituto Para a Qualidade de Timor-Leste, I.P sei organiza tuir departamentu haat: Departamentu Administrasaun, Departamentu Normalizasaun, Departamentu Metrolojia no Departamentu Kualifikasaun no Asuntus Internasionais. Dirijente sirs hosi kada departamentu sei ekiparadu ho Xefe Departamentu. Molok alterasaun ne’e, dirijente sira-nee ekiparadu ho Diretór Nasionál sira.

Membrus Konsellu Administrasaun no Konsellu Fiskal ekiparadu ho Diretór Nasionál sira no Prezidente Konsellu Administrasaun de’it mak ekiparadu ba Diretór-Jerál.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here